Aizawl: High Level Drug Disposal Committee, Mizoram chuan Champhai Police-in ruihhlo an man Rs vaibelchhe 101 chuang man hu chu nimin khan Trinity Hospital Incinerator-ah an hal ral.
Ruihhlo halte hi Champhai Police-in kum 2019-2021 chhunga an man, Pseudoephedrine kg 238.90, Rs. 8,68,46,000 man hu leh Methamphetamine kg 30.90 Rs 93,24,30,000 man hu, a vaiin Rs.1,01,92,76,000 man hua chhut a ni.
Ruihhlo halralna hun hmanpuitu DGP Devesh Chandra Srivastva chuan ruihhlo hian rin aiin Mizoramah zung a kaih darh nasat avangin ruihhlo darh zel tur ven hi Mizoram Police-te ngaih pawimawh ber pakhat a nih thu a sawi a, dan kengkawhtuten ruihhlo dona kawnga hma an laknaah hian Mizo mipuite theihtawp chhuaha thlawp tlat turin a sawm.
Devesh Chandra Srivastva chuan, kohhran leh khawtlang hruaitute pawh Mizoram Police te hmalakna thlawp zel turin leh ruihhlo a lo rem zel theihna tura nasa zawka ke pen turin a ngen a ni.
He huna tel Mizoram Police hotuten an tar lan danin, kumin January 1 a\anga March 24 chhungin police-in heroin kg 4.748, Rs. 23,74,00,000 man hu an man tawh a, hemi kaihhnawihah hian mi 40 man an ni.
Methamphetamine kg 23.593, Rs. 70,77,90,000 man hu leh a neitua puh mi pahnih an man tawh bakah Codeine gram 64300, Rs Rs. 96,450 leh a kaihhnawihah mi pathum an man tel bawk a. Kumin chhunga ruihhlo an man tawh zawng zawng hlut zawng hi Rs. 94,52,86,450 man hua chhut a ni.