MNF party adviser, school education minister ni bawk, Lalchhandama Ralte-in kum 2023 academic session thar atanga primary, middle leh high school-ah uniform inang vek ha tura ruahman chhan sawiin, “Zirlaite chu sikul dangah insawn mah se, hautak lo zawka uniform ngai an rin theihna turin kan ti a ni,” a ti.
Nimina MNF party chhung inkhawmah he thu hi Lalchhandama Ralte chuan a sawi a. “Mipui tan man tlawm zawkin free education kan buatsaih theih tak avang hian mipui thinlung a inthlak ta a, sorkar sikulah rinna an nghat ta a ni,” tiin, “Sorkar hmasaah khan sorkar sikul a tlahniam duai duai a, private sikul an bawh nasa a, kan sorkar kum thum chhung hian sorkar sikul khar ai chuan tihpun belh zawngin hma kan la nasa a, tunah chuan sorkar sikulah admit sen loh kan nei ta,” a ti bawk.
Lalchhandama Ralte chuan SEDP bu-a inziak angin Mizo hnam chawilar thei tura thangthartea Mizo nationalism tuh thei zawnga hma an lak nasat thu a sawi a. Pawl 6 atanga pawl 8 zirlaiah ‘Zonun’ tih zirtirna telh a nih thu leh English hlira zirtirna kalpui Science leh Mathematics-ah pawh academic session tharah chuan pawl 10 atanga pawl 12-ah Mizo tawnga hriat fiah awlsam tura ruahmanna siam a nih thu a sawi.
Minister of State Lalchhandama Ralte chuan zirna kawnga hmalakna dangte bakah a department enkawl dangtea hmalakna hrang hrangte a sawi bawk a ni.