Lungsen leh a chhehvel khaw 23-ten chawlhkar khat chhung power supply an hmuh tawh loh avangin mipuiin harsatna lian tak an tawk mek.
Thudawn danin, March 21, 2022 chhun khan Lungsen Power Sub-Station-a Lungsen leh a chhehvel khaw 23 chawmtu transformer 2.5MVA chhia chu vawiin thlenga siam that theih a la nih loh avangin he transformer-in a chawm khuaten harsatna an tawk nasa tawh hle.
Kum 1996-a bun tawh he transformer chhiat thu hriat a nih veleh Lungsen Power Sub-Station-a SDO H Lalengmawii leh Lalawmpuia, JE, Lunglei-a an hmunpui leh Aizawl-ah an thlen nghal a. March 22, 2022 khan transformer chhia thlakna tur Aizawl Zuangtui-ah 2.5 MVA thawm that sa awm chu phur turin Lunglei atangin lirthei tirh a ni a. March 24, 2022 khan Lungsen phurh thlen ni mah se, khawl hi a hlui thawm that tawh a nih avangin a hman theih loh thu thudawnin a sawi.
Radiator atanga oil putin oil value a tihsan theih loh avangin nimin thleng khan charge theih a la ni lo a. Transformer chhia siam that tumin Lungsen Power Sub-Division a thawktute leh mi tlawmngai thenkhatte chu zan thum an tlaivar tawhin, chhun zan zawmin hna an thawk mek zel a. Chutih laiin, tun hnai maiah chuan êng pek chhuah theih beisena a la chau rih hle nia sawi a ni.
He transformer chhia avang hian Lungsen leh a chhehvel khaw tam takin an dawr ber thin , Mizoram Rural Bank, Lungsen Branch pawh dawr theih a nih loh avangin mipuiin harsatna lian tak an tawk mek a. Transformer chhia hian Lungsen tui pump-na pawh nghawng telin, diesel khawl hmanga pump ni mah se diesel supply a awm loh avangin harsatna a nasa tawh hle niin thudawnnain a sawi bawk.