Kar khat awh tur pawl 9 leh pawl 11 zir zo chiahte tana chhiarkawp zirhona runpui -Mathematics Summer Day Camp, 2022- chu nimin khan Pachhunga University College-ah HRD board vice chairman L Thangmawia’n a hawng.
Mathematics Summer Day Camp hi Mizoram Mathematics Society (MMS), Mizoram Science, Technology & Innovation Council (MISTIC) leh Department of Mathematics, Pachhunga University college te tang- hovin an buatsaih niin, Pachhunga University college-ah neih a ni.
L. Thangmawia chuan Mizote zingah Mathematics chu subject hara ngaihna la awm bawk mahse, zirtirtute an that chhoh tak zel avangin a nihna dik tak kan hre chho mek zel niin a sawi a. Zirlaite pawhin an chhiar- kawp zirlaibu piahlam zir belh chakin Summer day camp, kumtina buatsaih thinah pawh an tel tha thei hle tih hriat chu hlimawm a tih thu a sawi.
Zofate zingah science, mathematics, engineering leh etchnology lama mithiam kan tam chho tan hle hi a lawmawm tiin L Thangmawia chuan state dang leh khawvel huap thlir erawh chuan tan lak nasat a la ngai hle tih a sawi a. Zirlaite zingah mahni leh chhungkaw tan mai ni lo, hnam tana zir an tam a ngai tih sawiin, “Hna kan thawh hnu thlengin mahni tan mai ni lo, hnam tana thawk nih inhria kan tam chuan hmasawnna nasa zawk lo awmin eirukna leh zawmthawtnate a reh dawn a ni” a ti.
L Thangmawia chuan zirlai tam tak ten Mathematics an hlauhna umbo tur leh zir belh duh ten an zir belh theihna tura Mizoram Mathematics society te thawhrimna fakin, theihtawp chhuah chhunzawm zel turin a ngen bawk.