- Lallunghnema, Charity Lodge
Kar hmasa khan India ram khawpui ber Delhi a Consumer Disputes Redressal Commission pakhatin Railway Authority cheng nuai khat zet a chawitir thu leh chu pawisa chu ticket neitu hnena pek a nih thu kan sawi a nih kha. Railway passenger-te hi consumer an ni a. Seat ticket pek chhuah hi thiang lo a ni a, Dan bawhchhiatna a ni. Railway thuneitute hian seat an lo pek thuah avang hian khin an ni a, Consumer Commission chuan deficiency in service tia puhin he Railway hi a hrem ta a, Cheng nuai khat a chawitir ta a nih kha.
Kha thu atang khan zir tur kan nei e. Consumer huaisen, mahni dikna leh chanvo champion pui ngam kan ni ve ang em? Consumer-hote kan inbihchian a ngai hle a ni. Mahni dikna leh chanvo pawh sual chhuak ngam lo nih hi a zahthlak a, a vanduaithlak hle a ni.
Online delivery boy ka hrawk:
Hmanni deuh lawk khan kan nau pakhat hian online delivery boy pakhat chuan chhuanlam tling lo tak hmangin home delivery a ti duh lova. Chu thu ka hriat chuan ka sa ta zak mai a. He delivery boy phone number hi ka dil sauh sauh a, thil awmzia ka zawt a. A bungraw dahna tur kawng kha a kual bakah tha vak lova. Mahse, he motor kawng hi siam that a ni tawh a. Harsa vak lova inkhalh thlen theihna a nih thute chu ka hrilh a. Hetianga chhuanlam rin tlak loh siama bungraw chah a thlenna tur thleng duh lo hi report kan dawng ta fo mai a. Hetiang an duhna hmun hmuna customerte an ching let fo hi a pawi hle. Online shopping reng reng hi direct selling a ni a. Khar chhawng policy kal kana bungrua pekna policy a ni. Chuvangin internet kal tlanga thil chah tute hian felfai takin thil an chah thin tur a ni. A man tlawm tih vang ringawtin bungruate chu chah tur a ni lo. Online shopping Regulation-te hi hriat kan tum tur a ni. Dawrkai sumdawng phei chuan an hre chiang leh zual tur a ni. Pawr taka bungraw lei tawh a thleng theih loh tih ngawt mai te, consumer-ten a thleng theih tia pawr chiam chi pawh a ni hek lo. Thil reng reng dam taka consumer protection hmanga indawr thin zawk tur a ni.
Tun tumah hian policy tha tak mai, nghah loh dawr tih thupuia atan kan hmang a ni a. Consumer-te tana sam khai leh awlsam a ni a. Consumer interest a ni bawk. Kan thupui sawifiah nan thlalak ka rawn chhawp chhuak nghe nghe a ni. He thlalakah hian balhla thlar tui hnai tak ka rawn tilang a. He balhla thlar chungah hian a man tarlan zel a ni. He balhla sirah hian pawisa nawi, sarang chhunga dah a awm bawk. Customer-ten pawisa an lak tur dah a ni bawk.
He nghah loh dawr neitu Pu F. Lalnienga chuan ka zawhna te heti hian min chhang a:
Ka zawhna: Hetianga nghaktu awm lova Balhla i zawrh hian i hralh thei tho em?
Pu Nienga: E, ka ti har ka ti mah mah a ni. Hetia, a man zat ka tarlan bakah pawisa kir tur ka dah hian kan Balhla hi ka hralh theih phah zawk a ni. Tifuh ka inti khawp mai. Bo thlau a la awm lo bawk. (Hei hi kâ-a chhang inbiakna chu a ni.)
Kum eng emaw zat kal taah khan Thenzawl kawng lama Aizawl-Lunglei Road tlang dung khaw thenkhatahte hian nghah loh dawr a lar hle a.Tun thlengin la awm turah ka ngai. Hetianga thut chilhtu awm lo, dawrte hian rawk an tawk em? An dawr thil a bo thlau em ka hre law, miin an ruksak loh chuan a tha a, pawisa an hmuh tur an hmuh a, an hlep tur thil hralhtute an hmuh tho chuan policy tha tak a ni ngei mai. Mahse, mitin kan rinawm ngai a ni ta ber. Pu Nienga nghah loh dawr ang hi awm ve fur se, bo awm bawk lo se, a va ropui dawn em? Hnam rinawm kan ni ang a, ram zalen kan ni ngei bawk ang. Consumerte tan hlei hlei hmasawnna nasa tak leh ropui a ni ngei ang
Ti hian ka ngaihtuah zel!
Kan dawrte hi nghah loh dawr ni ta vek se, khawlai dung leh vanga kan thil zawrhte hi nghak ta lo vek ila, engnge kan an ang? Kan mualpho chhe vek ang em? Kan intual vuak hial mai ang em? Bus fare-te hi bus chhungah Conductor pe kher lovin Bus kawngkapui bulah bawm hung se, passenger-te hian bus chuan man chu thlak zel se, bus chuan man thlak lo leh pe lo an tam viau ang em?