- Centenary C. Lalzahawma
Hringnun hi vul reng tùra duan ni lovin, chul thei tùra duan a ni.
Engkim tán hian hun ruat a awm ang hian, kan pian nî atanga kan thih nî inkárah hian hun hlimawm tak tak te, hun harsa tak tak te pawh tâwkin kan pal tlang thîn. Kan kum mil zêlin kan rilru puthmang a danglam a, kan ngaihtuahnate pawh a danglam thîn. Vànglai nun ngaia lunglèng tak leh khawhar taka mi thenkhat an kùn laiin, thenkhat erawh panlai nun ngaiin an lung a léng ém ém thung a. Chutiang zêl chuan kan ngaihtuahnate chuan kan hun kal tawhte min hriat chhuahtír fo thîn. Engkim hi engmah lo mai a ni a, engmah lo mai ni si he hringnun khawvêlah hian mi ropui nih tumin mi tam takin thlan tui fara hnathawkin kan bei leh lawi a! Khualzin anga lungkham nei lo leh rilru thawveng taka khawsa erawh pakhat mah kan awm lo! Sanà bán a vir kual reng ang hian, hringnun hi a vir kual reng a, tumah hi nihna ngai reng, dinhmun ngai rengah a din theih loh. Harsat manganna kan tawh pawhin buai mai lo ila, hun hian a liampui thuai dáwn tih hi hriat reng tùr a ni.
Tlawng lui pawn kang chah hun a nei a, Chite lui pawh a huang leng lo khawpa a len cháng a awm! Ruah a sûr reng lova, nî a sa reng hek lo! Lipui pawh lipui a ni reng lova, suar pawh suar a ni reng hek lo! Chung lam thuneihna ang zêlin khuang ruahpui sûrin, lipui chu suarah chantírin, suar pawh lipuiah a chantír fo. Chuvàngin, hringnun kawng kan zawh méknaah hian kan chungah roréltu a awm tih kan hriat a pawimawh. Dinhmun thaa kan din avàng ngawtin chapo thei kan ni lo. Tin, dinhmun awhawm lo leh dinhmun retheia kan din avàngin kan rethei reng dáwn tihna a ni lova, kan indah hniam tùr a ni hek lo. ‘Hringnun hi eng lai pawha inthlâk danglam reng thîn a ni’ tih kan hriat a pawimawh. Kan hma hun chu kan chunga roréltu rèl tùr a ni a, kan tih ve tùr awmchhun chu, beiseina nung nèn theihtàwp chhuahin mahni theihna záwn theuhvah kan tán leh mi dangte tán kan bei tùr a ni.
Hringnun hi a hring reng thei bîk lova, thlalèr ram ro aia a khaw ro cháng pawh a awm fo thîn! Dinhmun thaah kan ding reng thei lova, dinhmun tha loah pawh kan ding fo vang. Kan chunga thleng tùra kan rin ngai loh leh kan beisei phâk bâk harsatna lian tak takte pawh a lo thleng ang. ‘Thihna a thlen loh phawt chuan a tha vek e’ tih hi kan inhnemna ni fo rawh se. Dam phawt chuan kawng a awm zêl thîn. Chu kawng zawh tùr chuan huaisenna kan mamawh. Thil siam réng réng Siamtu’n chhan neia a siam ang hian, thil thleng zawng zawngte pawh hian thlen chhan an nei vek bawk. A chhan kan hriat loh avàng ringawt hian chhan nei lovin a thleng tihna a ni lo. Beidawng mai lovin kan bei hrãm hrãm tùr a ni.
Kan hmangaih ém ém, thian thaa kan ngaih, an harsat mangan lai pawha thih huama kan lo tante, theihtàwp chhuaha mahni hna tûl kalsana kan lo buaipui a, dinhmun sáng zâwka dintíra lallukhum kan khumtírte ngei pawh hian, harsat manganna kan tawh ve meuh chuan an tána kan thil tihte chu min hriat rengsak tawh lo fo thîn. Hringnun hi eng lai pawha inthlâk danglam reng thîn a nihzia hi mihringte rilru puthmang mak tak atang hian chiang takin a hriat theih mai àwm e. Motor pawh thui tak takah kal thîn mah se, a chhuahna hmun vèkah a kìr leh thîn ang hian, mamawh lai chauhva min hmangaih thar thîn te bawk hian a ni, khua reiah min mamawh nawn leh thìn ni. Hringnun hi inmamawh tawnna hmun a nih miau avàngin! Hlim nî leh làwm ni chauh ni lo, harsat leh puih (tanpui) kan ngaih lai pawha kan bula ding thînte hi thian tha chu an ni a, khawvêl a awm chhúng chuan a ni reng bawk ang.
Eng dinhmunah pawh ding ila, lungawi thiam zêl a pawimawh. Làwmna cháng hre lo mi hausa nih ai chuan, chantâwka lungawi thiam mi rethei tak nih pawh a thlanawm zâwk. Taksaa rualban loh nih aiin rilru lama rualban loh nih a pawi zâwk! “Siamtu’n, mi rethei leh vákvài mai nia kan inhriat hian, keini aia mi rethei zâwkte min hmuhtír a. Thihna khawp hiala lungngaihna kan tawhin, mi nung kan la nih rengzia min hriattír a. Kal ngaihna réng réng hre lo anga kan inhriatin, kalna tùr fuke nei lo mi tam tak min hmuhtír a. Min siam dànah lungawi lohna kan neihin, keini aia lungawi lo tùr mi tam tak min hmuhtír a. Mi thiam nia inngaihna kan neihin, keini aia thiam zâwk mi tam tak min hmuhtír a. Kan neih phâk loh te hmua kan lungngaihin, hmu chák hmu thei si lo an tamzia min hmuhtír a. Thil ri mawi tak tak kan hriatin, hre chák hre thei si lo an tamzia min hriattír thîn.” Engkim mai hi mite lo tawn hnu vek a ni a, thil thar réng réng a awm lo! Eng dinhmunah pawh ding ila, vuina tùr emaw, chhuanlam emaw kan siam thei lo vang.
Hringnun leh harsatna hi unau piang hmun ang maia inzawm tlat an nih avàngin, mihringte nunah pawh hian nun hahdam leh nun nuam kan neih reng hi kan beisei tùr a ni lo. Anchhe dawng khawvêlah duhthusàm famkim a thleng ngai lova, a thleng ngai dáwn bawk lo tih hi kan hriat angai fo. Beiseina phènah natna a inphúm ru teuh thîn tih hria ila, tu lakah mah beiseina säng lutuk neih loh hi a finthlâk fo. Pangpár huan, enkawltu tha tak enkawlna hnuaia Rose pár mawi tak ai chuan, khàm chhengchhe tak kára Rose pár chu, mite mit hmuhah a máwi zâwk satliah mai ni lovin, a màwi dàn a danglam bîk thîn. Chutiang tho chuan, nu leh pa thla zàr hnuaia nuamsa taka hringnun hmachhawn thînte ai chuan, harsatna tam tak kárah hlawhtlin ngei tuma hringnun hmachhawna mi hlawhtlingte nun chu mite mit hmuhah a ropui bîk lo thei lo! Mihringte hi kan hun kal tawh atanga teh kan nih fo avàngin.
Engkim hi engmah lo mai a nih avàngin, hringnun ngei pawh hi a ropui bîk chuang lo. Lei chung leh vàn hnuaiah thil ropui a awm lo, ropuia inngai erawh chhiar sèn loh an awm. thenkhatin hringnun hlimna pár an chèn a, thenkhatte erawh lungngaihna mittui nèn, beiseina tlémtê avàngin hma lam an pan hrãm hrãm a ni. Eng dinhmunah pawh dingin, eng ang harsatna pawh tâwk mah la, hringnun duantu, hmangaihtu Pathian bulah lâwm avànga bianga mittui luang chunga làwmthu i sawi ngei theih nán bei hrãm hrãm la, lo tuar hrãm hrãm ang che. Hun hian hun tha a lo her chhuahpui thuai ang.