Ministry of Housing & Urban Affairs-a Joint Secretary (Coordination & North East) Pankaj Kumar Singh-a’n Mizoram hmun hrang hranga sorkar hmalakna a tlawh hnuin, Inrinni khan deputy chief minister, UD&PA leh PHE changtu, Tawnluia chenna inah tukthuan a ei a. UD&PA leh PHE deparment hnuaia sorkar laipui scheme hrang hrang chungchang leh hmalak chhunzawm dan turte an sawi dun.
Deputy chief minister chuan union joint secretary-in Mizorama hmalaknate a en chu lawmawm a tih thu a sawi a. Hetiang taka rawn ngai pawimawhtu hi an tam lo hle niin a sawi.
Union joint secretary chuan Mizoram sorkarin a lo dawnsawn danah lawmthu sawiin, Mizorama a department chan hnuaia hmalaknate a theih anga chipchiara a tlawh thu leh a hmuh tawh chinah sorkar hmalakna a that thu leh lawmawm a tih thu a sawi a. Hmalak meknate a hlawhtlin vek theihna tura theihtawp chhuaha a ngaihven zui tur thu deputy chief minister chu hrilhin, rawtna hrang hrang an thlente pawh theihtawpa a bawhzui tur thu a hrilh bawk.
Pankaj Kumar Singh hi India hmarchhaka urban scheme leh programme te vil tura ruat niin, kar kalta Nilaini khan Aizawl thlengin PHED, UD&PA SIPMIU hmalakna hrang hrang a tlawh a ni.