First half-ah goal thum an khung a, second half-ah theihtawp chhuah a an tan a ngai. An tumah erawh an hlawhtling a, Liverpool in FA Cup final an khel dawn.
Inrinni zana Wembley Stadium a inkhelah Liverpool in a tir minute 45 chhungin an tan hmun an siam a. Premier League a an elpui Manchester City nen kar hmasa Pathianni a an inkhel ang ni lo takin halftime hma in an khingpuite an nghaisa.
Second half-ah City insiamtha mahse an si phurh an sut zo thei lova. Carabao Cup chawi tawhtu Liverpool in FA Cup final an khel dawn a. Premier League a an elpui ber City lakah rilru inbeihnaah an chungnun zawk avangin tun season-ah trophy pali chawi mai tura rin an kaina a lian tawlh tawlh.
Manchester City manager Pep Guardiola chuan Kevin de Bruyne leh Kyle Walker te bul a tan tir theih loh zanah goal-ah Ederson aiin Zack Steffen a khelh tir a, a tisual.
Ibrahim Konate chuan minute 9-naah Liverpool hmahruaina goal a tauh lut a. Steffen chuan chesualin a goal hma a ball a khawih rei avangin Sadio Mane chuan goal a khung belh.
Halftime danah Mane bawkin goal a khung a. City in second half tan veleh Jack Grealish hmangin goal an khung a, a tawp dawnah Bernardo Silva chuan goal a khung leh bawk a, a vawi thumna erawh a awm thei lo.