AIZAWL: Thil hlui vawnhim leh humhalh tlakte humhalh a tulzia inzirtir thar lehna ni World Heritage Day hman a ni. He hunah hian Tourism Deprt. Director V Lalengmawia, MCS, chuan thu sawiin, “Mizoram hi ram pumah khualzin rintlak ni tura hmalakna atana Responsible Tourism Policy nei hmasa ber kan ni,” a ti.
Tourism Department leh Zoram Research Foundation-te tangkawp huaihawtin Directorate of Tourism office, MINECO-ah nimin khan World Heritage Day 2022 hman a ni. He huna thusawitu Tourism Dept Director V Lalengmawia, MCS, chuan, khualzin rintlak ni tura inzirtirna in a tum chu Pathian thil siam khawvel mawina tichhetu ni loa humhimtu nih te, thlen chin apianga faina leh thianghlimna nunpui te a nih thu sawiin, khualzin rintlak chuan laksaktu ni loin petu nih a tum zel thin tih a sawi.
Tourism chungchanga ngaihtuahna thar pe zel thin tu chu mipuite an nih thu leh social media platform an hman tangkai hle thu a sawi a. Sorkar chuan tihtheih chin tawk a nei tih sawiin, a tak taka tangkai zui thei chu mipuite an nih thu a sawi a. Hetih lai hian, mitin sorkar bungrua enkawl danah hmasawnna tur kan la ngah hle tih sawiin, “Kan Tourist Lodge-te, kan Golf Course-te lakah mipui rilru puthmang hian hma a sawn a tul a ni,” a ti.
Mizoramah khawvel ramdangte rualin Village Tourism/Rural Tourism hi mumal leh kawnghmang nei zawkin uar chhoh zel a nih thu sawiin, ram dang at anga lokalte ei tlakin ei leh in siamte leh hnam zia pholang thei incheina te pawh hnamdangte tana en tlak turin tun aia uluk tur leh, Best Green State ni fo chungin ramngawte erawh a kiam zel a, hunpui hrang hrangah thing phun uar zel turin mipui a chah.
World Heritage Day 2022 hmanna inkhawmah hian Association of Tour Operators Mizoram-a an General Secretary Joe R. Z. Thanga’n kalkhawmte hmaah thupui ‘Heritage and Climate’ a sawi hawng a. Inkhawm hi Rochamliana, General Secretary, Zoram Research Foundation-in a kaihruai a. Sawihona leh zawhna leh chhanna hun hman a ni bawk.
He hunah hian Mizoram University, Pachhunga University College, Govt. Aizawl College, Govt. Johnson College, Govt. Aizawl West College leh ICFAI atangin zirtirtu, researcher leh zirlai thahnem tak an tel a. Tourism Department, Zoram Research Foundation, SEL Foundation leh Association of Tour Operators Mizoram atangin an tel bawk a ni.