- Thangkhuma (T-a)
Ahmedabad tlangval Tarun Mehta leh Bengaluru tlangval Swapnil Jain chuan IIT Madras-ah engineer nih tumin an zir dun a, an inpawl rual chiah a, an khawthlir a thuhmun.
An zir chhuah hnuah kal hrangin hna an thawk ve ve na a, an duhkhawp an hmu lo. 2013 khan lehkha an zir dun laia an suangtuah thin, an duh ber tihlawhtling turin Bangalore-ah Ather Energy company an din ta a ni.
Electric vehicle siam turin sum erawh an tlachham hle a, a tirah Flipkart neitu Binny leh Sachin Bansal unauin puiin thahnem tak an pe. 2016 khan India rama vehicle company lian Hero moto Corp chuan vaibelchhe 200-in a pui ve leh a, 2019-ah Sachin Bansal chuan vaibelchhe 220 a chhung lut leh bawk.
Indian engineer pahnih, kum 28 mi ve ve Mehta leh Jain chuan an duhthusam thin tihlawhtlingin electric scooter chi hnih – Ather 450 leh 450x an siam chhuak thei ta a, ICE hmang 125 cc scooter ho nena kawng hrang hranga intluk tawk tak niin tun dinhmunah an hralh chhuak tawh a, fak a hlawh viau.
Mizo zinga lirthei hriatna kawnga thuk leh khawthlir nei thui bik tak Pu Bawla Kawlni hian kum hnih chuang kal ta khan India rama electric scooter an siam chhuah zinga chi hrang pathum lei tumin a hauh (booked) tawh a, Mizoram tana tha leh hman tlak a ni em tih a taka hriat chian tumin Ather 450x hauh nan Rs 2500, Ola scooter hauh nan Rs 500 a seng.
Guwahati-ah Ather dealership hawn a nih rualin Pu Bawla hi hauh lawk hmasa pathumna a ni a. Mizo tan lei mai theih a nih loh avangin Guwahati-a cheng, an vai thiante nen tang tlangin an lei.
Chutah Mizoram Transport Department hnuaiah ziah luh theih a ni lo leh zel a, Assam sorkar hnuaia ziah luh a ngai. Ather 450x electric scooter lei nan a man pangngai bakah sum a sen belhin a buaipui hle a ni.
He battery hmang scooter hian back-gear te a nei vel a, tlan chak duh dan azirin gear ang deuh mode chi li a awm bawk.
Khawvelin electric vehicle hman hlan a nghakhlel a, lirtheiin boruak chhia a pek chhuah tihbona tur a nih bakah oil leh fuel ngai tawh lo tur a ni.
India pawhin buaipuiin Department of Heavy Industry chuan April 1, 2015 khan scheme lian tak FAME tia hriat lar “Faster Adoption and Manufacturing of Electric and Hybrid Vehciles in India” a tlangzarh tawh.
FAME hi sorkarin electric vehicle atana chak taka hma lak a nih theihna tura a siamtu leh hmangtute a puihna a ni ber a, hamthatna chi hrang hrang siamsak an ni. April 1, 2019 khan kum thum chhung atan a hma aia changtlung leh huam zau zawkin FAME phase II a tichhuak leh.
Heng zawng zawngah hian Mizoram sorkar chuan electric vehicle atan inbuatsaihna emaw hma lakna emaw a la nei miah lo niin a hriat. FAME hnuaia hamthatna nei ve tur zawnga ke penna pawh a nei miah lo niin a lang tel a; chu chu sawi loh, electric vehicle nei duh tan pawh ziah luh theih a la ni lo cheu zawk!!
Tripura sorkar chuan an state chhungah awmze neia electric rickshaw an hman theih nan, January 2014 khan dan ‘Tripura Battery Operated Rickshaw Rules 2014’ a siam daih tawh.