OTT khawvela brand lian ber zingah Netflix a langsar fal a, web show lar tak tak leh movies hit tak tak te lei theihna a neih bakah lemchan khawvel thunun thei hial khawpa theihna leh thiamna a neih dan te pawh Hirpui len chhoh lai vel khan chiang taka hmuh leh tem theihin a awm.
Mahse, tunhnai chho atang khan a kalphung leh kaldan enfiah ngai khawpin hniam lam a pan ta tlat mai a, ni 100 tling lovah subscriber nuai hnih zet a hloh. Share level tlakhniamna 37% a ni ta. Hei hian mi tam tak a barakhaih a, a tihnual a, level tin maiah lawmna tur a tlem tial tial.
India bikah pawh Netflix hian a bu lum luah thei turin a la bei fat fat mek chauh a ni a, a chhan tam tak a awm thei ang.
A man chungchang
Mak i ti viau mai thei. A tir lamah khan India rama pawhman kha a to fu mai a, mahse pawttu an tlakhniam phah hran lo. Thil mak tak a tling. Nikum December khan pawhman hniam ber ni turin thlakhatah Rs 149 a rawn vawrh chhuak a, tla fuh viau turah an ngai a ni mai thei. Mahse, a tawk chuang lo!
Hlawkna chhawm tel tlem
Khawvela streaming company lian ber hian a elpui lian pahnih Disney+Hotsar leh Amazon Prime Video te aia a that falna leh duhthlanna tur chhan a nihna sawi fak tur a nei lem lo.
Tualchhung film
tam tawk lo
Netflix hian international movies leh show tha tak nei ve bawk mah se, Indian content tih tham a pai tel tlat lova, a neihchhun ang ang pawhin Indian audience duhkhawp a tling lo. Hei vang hian content stragegy lamah tan lak thar a ngai ang a, Indianness tak ni thei tur Indian content tha tak tak a vawrhchhuah taimak a ngai.
Elpui dang te tlan
khalh thei lo
Tunhnaia zirchiannaa Netflix hian India-ah pawttu maktaduai 5.5 vel a neih laiin, Disney+Hotstar leh Amazon Prime Video te’n pawttu Maktaduai 46 leh Maktaduai 22 lawih mai an nei a, inthlau vet vet tak an ni. Dik taka sawi dawn chuan, Netflix hian heng streaming company lian pahnih te hmalak dan leh chai kual vel dan hi uluk taka a zirchian a, a bihchian a ngai. A tul dan azira huai taka insiamrem a, insiamtha ngam tur pawhin a vun a tichhah a tul bawk.