Paris Saint-Germain in record dinglai tluk an hnaih a. A vawi 10-na atan French champion ni turin vawikhat tlawm loh bak an mamawh tawh lo.
Nilaini zan Ligue 1 inkhelah PSG hian Angers chu 3-0 in an hneh a. An club chanchin a vawi 10-na atan league title chawi turin point khat bak hmuh belh an mamawh tawh lo.
Stade Raymond-Kopa a inkhelah PSG tan hian Kylian Mbappe, Sergio Ramos leh Marquinhos ten goal an khung a. Khelh nga la awm ah point 77 hmu mekin point 15 in pahnihna a awm Marseille nen an inthlau.
Inrinni zanah PSG hian Parc des Princes-ah RC Lens an mikhual dawn a. He inkhelah hian an tlawm loh chuan an champion ang.
Ligue 1 chanchinah Saint-Etienne in vawi 10 champion a record an siam chu an tluk chiah dawn a, anni hian kum 1957 leh 1981 inkarah league title 10 an la.
Nilaini zan hian PSG hi an champion nghal teuh hle a. Marseille in Nantes mikhualin tum hnih Nantes hian hma an hruai hman a, mahse 3-2 in Marseille in an lehthal a. Dimitri Payet chuan penalty atang goal hnih khungin Amine Harit chuan chakna goal a khung.
Ligue 1-ah hian a sang pahnihin Champioins League group stage an khel anga, pathumna in third qualifying round an khel ang.