Mi 53 lai chuanna, Indonesia tuipui sipaite tuihnuailawng chu a bo va, ngawrh takin an zawng mek tih thuneituten an sawi.
Tuihnuailawng hi Bali thliarkar hmar lam tuipuiah drill neia thawk chhuak a ni a; mahse, a lo kir tawh rih lo.
Indonesia-a military chief chuan an indo lawngte chu KRI Nanggala-402 zawng turin an tir chhuak tawh tih a sawi.
Thuneitute hian Australia leh Singapore pawh be tawhin an tuihnuailawng bo mek zawnpui turin an ngen a. Heng ramte hian vantlang hriatah engtinmah an la chhang lo thung.
German siam tuihnuailawng hi Bali vaukam atanga km 96 vela hla tuipuia a awm lai atangin tukin atang khan biakpawh leh hmuh theih a ni tawh lo.
“Navy chuan a zawng mek zel a, a hmun lai hi chu kan hre chiang a; mahse, a thuk hle a ni,” tiin First Admiral Julius Widjojono chuan AFP news agency a hrilh.
Mi thenkhat chuan tui chhunga a luh chiah atangin a biakpawh theih loh nghal niin an sawi.
Tuihnuailawng hi Indonesia-in a neih panga zinga mi a ni a. Kum 1970 chho tawp lama siam niin South Korea-ah kum hnih siam that niin kum 2012 atanga hman tan leh a ni.