Dantewada district, Chhattisgarh-a duty sipai pakhat chuan a kut lehlama silai hum chungin, thingtlang khaw kilkhawra nau hrin hun tawh hmeichhia, hlang siamchawpa khaw miten kea an kalpui chu puiin thui tak a zawnpui a, fak a hlawh hle.
Sipai hian km 3 chuang zet nu hi zawnpuiin District Reserve Guard patrol vehicle-in an nghahna thleng a kalpui a ni.
DRG thuneitute chuan ambulance thlen ngaihna awm lo khuaah hian hlang siamchawpa nu an zawn chu an lirtheiin damdawi in an panpui zui a ni.
Kawng chep takah, a sir vela lo zau tak awmna chhengchhe taka sipaiin khaw mite nena silai kenga nu a zawn lai video hi social media-ah nasa taka thehdarh a ni.
Dantewada district-a Kuakonda khaw kawng hi Naxal-in an tihchhiat nasat avangin kal hleihtheih a ni lo va. Nu hian nau hrin a hun tawh si a, Palnar damdawi in, an khua atanga km 90 chuanga hla chu an panpui a ni.
DRG sipaite hi khuaah kalin mau hmangin hlang hi an siam chu an pui a, khaw pawn daiha lirthei an hunna thleng zawn a ngai a ni.
Video thehdarh dangah chuan hmeichhe chhungten damdawi ina naute an pawm lai a lang a. Thuneitute chuan nau, mipa leh a nu hi an tha niin an sawi.
Naxal helho hian Chhattisgarh-ah hian Dantewada leh Bastar velah venhim hna thawktuten khua an thlen theih loh nan kawng an tichhe nasa thin hle a, khaw mite tan harsatna a siam nasa hle.
Thla hmasa maiah pawh khan Naxal-ho hian Bastar huam chhung, Sukma district-a Central Reserve Police Force sipaiten camp an siam thar chu beiin CRPF pathumin hliam an tuar a ni.