Aizawl: Power Minister R Lalzirliana chuan kawlphetha chhit man pung tam tia phuna sawiseltuten an chian meuh chuan a punna a tam lo tih an hmuh thu a sawi.
Mizo Hnam Rûna nimina MNF chhung inkhawmah power minister hian thu sawiin, thawk khat laia political party pakhatin kawlphetha chhit man a pung tam tia phuna sawiseltuten an zuk chian meuh chuan a punna a tam lo tih an hmuh thu a sawi a. “Tu pawh sorkar se, power tariff hi kum tin JERC-in a ennnawn thin a ni,” a ti.
Tunah hian ngaihtuahna sengin Chhimtuipui (Kolodyne)-ah meghawatt 400 pe chhuak thei tura hma an lak mek thu a sawi a. “State thenawma power kan chawk luh hi eng emaw intihbuai thilah kan inthlunzawmna hruite hi min tihchhiatsak theih avangin, ei leh bara intodelh kan tihmakmawh angin power-ah pawh kan intodelh a ngai a ni,” a ti a. Nikum khan NABARD sum hmangin kuthnathawktute zau hrang hrangah êng pek luh a nih thu leh kawlphetha chakna hmanga hnathawk thei tura hma lak a nih mek thu a sawi.
Aizawl khawpui chhunga electric hrui zam hnawk zual then faina tur te, electric ban hlui tawh tak takte thlakna tur te, power station chhe zual tihthatna tur atana senso turte sorkar laipuiin Rs. vbc 700 atanga 800 chu DPR siamin a thuphunga pawmpui a nih tawh thu sawiin, “Local council-te leh official-te nen tang tlangin kan enho mek zel,” a ti.
Land Resorces, Soil & Water Conservation Minister hian kuthnathawktute tan rubber ur rona tur Rubber Smoke House 50 zet sak mek a nih thu a sawi bawk.
MNF party chhung inkhawma tun hnaia MADC inthlang tur campaign-a zin report pek a nih danin, MNF-in sorkarna an la siam ngai lohna hmun, MADC inthlanpuiah sorkar an siam ngei an rin nghet tlat thu te, khaw hrang hrangah bialtu MLA leh MNF sorkar hnathawh an hmuh avangin MNF VC thar a pian nasat thu leh campaign-a an zin kualnaah mi thar eng emaw zat lawm luh an nih thu te tar lan a ni.