Khawmpui hlawhtling neih a ni leh thei ta
Covid-19 hri leng vanga nunphung buaia kum 2 dawn kan awm hnuah Mizoram a kohhran lian ber Presbyterian kohhran chuan kartawp khan pastor bial hrang hrang inkhawmpui an hmang leh thei a, pastor bial hrang hrangah palai riak lut leh langa kal tam tak an awm bawk.
Pastor bial hrang hrangte chuan tisa leh thlarauah hlawkna an chan nasat thu an sawi a, hri leng vanga nunphung pangngaia hman theih loh a nih hnua pangngai taka hman a ni leh ta hi lawmawm tak a ni.
Hri leng tan kum, 2020-ah khan Bial Inkhawmpui hun April thlaa Pathianni chawhlhni hnuhnung ber hmangin khawmpui neih theih a ni lo a, kum tawp dawnah rorel palai tlem te nen inkhawmpui neih a ni. Nikumah pawh vantlang Pathian Biak Inkhawm tel loin a hun bi loah pawh inkhawmpui hi neih a ni a. Inrinniah rorel inkhawm bak neih theih a ni lo tawh bawk. Kuminah erawh Pathian hruaina changa khawmpui hlawhtling tak neih a ni leh thei ta hi lawmawm an tih thu a ri nasa hle a, hun dang zelah pawh boruak ralmuanga neih zel i beisei tawh teh ang u.
Kan hmalam hun leh kan thil tawn tur hi kan hre lo hle a, kan hriat loh luatah kan ruahmanna hrang hrang pawh a hlawhtling lo fo tawh thin. Chutih laia Pathian venna leh hruaina changa hun tha kan la nei thei thin erawh kohhran hote hian lawmthu sawi tharna leh Pathian lam hnaihna kawnga tanlak nan i hmang zel bawk ang u.