Nigerian thuneitute chuan dan phal lohva tuialhthei thlitfimna hmun puakah mi 100 vel an thi tih an sawi a, police-te a hmun neitu hi an zawng zui mek.
An ram chhim lam, Imo state-a kangmei nasa tak a chhuah lai hian thlitfimna hmunah hian mi thahnem tak hnathawkin an awm nia hriat a ni.
Tam tak chu tute nge an nih hriat loh khawpin an taksa a kang chhe nasa.
Rikrum thila che chhuakte chuan thi zat hi an pung zel tih an sawi a. National Emergency Management Agency hotu, Ifeanyi Nnaji chuan BBC Igbo hnenah thi an hriat theih chin hi mi 109 an ni tawh tih a sawi.
“Ruang tam tak chu a bul hnaia ramngaw leh thing buk hnuaiah te hmuh an ni a. Kangmei a chhuah khan inhumhimna zawngin a bul hnaiah hian an tlan lut a ni ngei ang,” tiin AFP news agency hnenah a lo sawi tawh bawk.
Youths & Environmental Advocacy Centre chuan tuialhthei lei tum lirthei thui taka intlarte pawh a kang chhe nasa hle tih a sawi.
Sorkar chuan dan phal lohva tuialhthei thlitfimna hmun siamtu ber hi a tlan bo mek a, man duh (wanted)-ah an puang a. An man thuai an inbeisei thu leh an man a nih chuan thil thlen dan pawh an hriat chian theih an beisei tih an sawi.
Thuneitute chuan a hma atang tawhin dan phal lohva tuialhthei thlitfimna siam hi an lo buaipui tawh a ni.
Inrinni zana thil thleng hi a chhan hriat an la nei lo va, zankhuain a kang zui a. A chhan tak la hre lo mah se heng hmunah hian tun hma pawhin kangmei leh chhiatna lian tak tak a thleng fo tawh thin a, dan phal lohva din a nih ang ngeiin thawktute tana himna pawh ruahman that a ni hlawm lo.
Hetiang hmunte hi khualrel humhim duhtute pawhin hnawk an tiin an lo sawisel tawh thin a, thuneitute hnenah pawh hmala turin an thlen fo tawh thin.