Kum 2020 chhunga United States-a naupang leh tleirawlte thih chhan tam ber chu silaia inkah a ni a, lirthei chetsualna avanga thihna a khum tih zir chianna tharah hmuh a ni.
Centers for Disease Control & Prevention (CDC)-in a chhinchhiah dan chuan kum 2020 chhung khan American thalai 4,300 chuang zet silai puak kaihhnawih avangin an thi.
Mahni intihlum pawh an tam hle a, silai avanga thihnaah hian tualthahna a tam ber bawk.
US-ah hian mi malin silai maktaduai 390 chuang zet an nei.
Kar kal taa New England Journal Medicine-a zirchiannaa an hmuh tar lanah tualthahna chi hrang hrang zingah silai avanga thihna chu American kum khat atanga 19 inkarte zingah 33.4% zetin a pung.
Kum 2020 chhung hian US-ah hian silai hmanga mahni inthahna pawh 1.1%-in a pung bawk.
Silai vanga naupang leh tleirawl thihna hrang hrang – mahni intihhlum, mi thahna, chhan hriat loh zawng zawng nen 29.5%-in a pung.
“Kan naupangte hi inven theih thihna lakah kan la venghim thei lo chhunzawm zel a ni,” tiin Nilainia zir chianna an tar lanah tar lan a ni.
Mi 1,00,000 zela hmeichhia leh mipa zinga silai avanga thihna pawh a pung vel a. Hnam bil hrang hrang zingah mihang zingah a pung nasa zual hle.
A kum hmasa lamah khan lirtheia chetsualna chu thalaite thih chhan tam ber a ni a, silai hian a dawt a. Lirtheia chetsualna avanga thihna hi tlahniamin kum 2020-ah khan American kum 19 hnuai lam mi 3,900 vel an thi.
Drug overdose leh tûr ei vanga thihna chu kum 2019 atangin 2020-ah hian 83.6% zetin a pung a, thalaite thihpui tam ber pathumna a ni.
Zir chianna dang, April thla tira tihchhuahah khan kum 2020 chhung khan overdose vangin thalai 954 an thi a, kum 2019 kha chuan 492 chauh a ni.
US-ah hian silai chelekna hi kum 2020 tir lama Covid-19 a len hnuah a tam zual a ni.