Myanmar tual chhung buaina avanga an sahimna zawnga Mizorama tlan lutte chu chhinchhiah mek a ni a, heng mite hi indentity card pawh pek zel niin chhinchhiah leh identity car pek chhuah hna hi zawh thuai tum a ni.
Raltlante buaipui tura sorkarin a din, Task Group on Myanmar Refugees-in raltlan chhinchhiah hna hi an thawk a, an ruahman dan chuan raltlante chhinchhiah leh identity card pek chhuah hna hi February thlaa zawh tum a nih laiin relief camp-a hri leng a hluar avangte-in a hun hi pawhsei a ni.
Tun hnaia Mizoram hmun hrang hranga ruahsur leh thlipui thawkin raltlan thenkhatte awmna camp a tichhia a, task group-in report an dawn chinah Lawngtlai district-ah camp panga leh Lunglei district-ah camp pakhat a chhia a. Raltlante tanpuina pek dan tur hi ngaihtuak mek a ni.
Thu dawn danin Mizoramah hian raltlan 30,000 chuang an awm mek a, an zingah hian kum 2020 Myanmar inthlanpuia thlan tlin MP leh state-a dan siam pawla thlan tlin 30 bawr vel an tel ve.
Official-te sawi dan chuan relief camp a awm khawmte chhinchhiah hna hi chu a harsa vak lo va; mahse, chhungkhat laina leh thiante belte, mi in luaha khawsate chhui zui a harsa deuh va. Chubakah an lo luh hnua haw chho lehte an awm bawk avangin raltlan awm zat pawh hi a danglam reng niin an sawi.
Tun hnai khan Chin National Army (CNA) leh mipui tangrual sipai pawl hrang hrang, Chin state leh Kalaymyo-a awm mekte chuan thuchah intawm siamin raltlante lo huma an lo enkawl danah Mizoram mipui, sorkar, kohhran leh pawl hrang hrangte chungah lawmthu an sawi.
Hetihlai kara raltlan anga awma ruihhlo tawlh ruk chingte chu an chhinchhiah a, an umzui dawn thu an puang a. Raltlante pawh an awmna khua theuhva khawtlang tana mi tangkai ni turin an chah a ni.