Mara autonomous district council inthlan lo awm tur chungchangah MNF party adviser robert Romawia Royte-in nimin khan press statement tichhuakin, Siaha district-in roreltu a neih fuh loh thin avangin hmasawnna a kal chak theilo rei tawh niin a sawi a. Tun dinhmunah Mara mipui tan MNF party a tha ber niin a sawi.
Robert Romawia chuan Siaha district-in Zoram hmun dang umpha turin sorkar pathum tangrual (central, state leh MADC) a mamawh tih sawiin, MNF chu central-a sorkar NDA-ah a tel thu a sawi a. “Central, state leh MADC sorkar tanghovin Siaha district hmasawnna tur hi i nawr ho ang u, state sorkar tel lovin MADC sorkarin engmah a ti theilo tih hrechiangtu in nih kha” a ti.
Mizoramah MNF sorkar nghet taka a din mek thu sawiin, Robert Romawia chuan tuna a lan dan chuan kum 2023 inthlanah pawh MNF bawk a sorkar leh dawn niin a sawi a. Mara mipuiin state sorkar do tlattu MADC sorkar neih fuh loh zia an hria nia sawiin, chak taka hmasawnna a kal theih nan “Khawngaihin mawhphurhna min pe ve chhin te u” tiin Mara mipuite a ngen bawk.