Golden State Warriors in Western Conference Playoffs-ah first round series an la a. Denver Nuggets lakah 102-98 a hnehna changin 4-1 in best of seven series-ah an chak.
Warriors tan an star player Stephen Curry chuan tun playoffs-ah a vawikhatna atan inkhel bul a tan a. GSW tana a lo tih fo tawh angin playoffs-ah hnehna a chanpui a, an team khaipa berah a tang lehnghal.
Curry hian point 30 score in 3 pointer 11 atang vawi 5 a lut a. Klay Thompson leh Gary Payton II ten point 15 ve ve an score.
Curry hi regular season tawp dawn lamah hliam a neih avangin tun playoffs-ah minute tam a team in an la khelhtir lova. Jordan Poole a chetthat bawk avangin mamawhna a sang lem lo.
Warriors shooting guard Klay Thompson chuan, “Steph hi player danglam a ni a, ani ang hi kan hmu leh tawh lovang. A 3 point shoot thenkhatte bakah rim hnaih atanga ball a pass kual dante kha a pui hle.” tiin a teammate a fak.
NBA champion lai Milwaukee Bucks pawhin 4-1 in Chicago Bulls lakah series an la a. Eastern Conference Playoffs-ah 116-100 in game 5-ah an chak.
Bucks hian an player tangkai Khris Middleton chu inhliam avangin la chhawr thei lo mahse Bulls hneh turin harsatna an tawk lova. Tunhnai game thumah an point score inthlau thei hle.
Star player Giannis Antetokounmpo chuan point 33 leh rebound vawi 9 a la.
Regular season a East lama seeded number 3 Bucks hian seeded number 2 Boston Celtics chu Eastern Conference semifinals-ah an khel dawn a. NBA a offensive star lian pahnih nei Brooklyn Nets hnehtu, theihtawp chhuah a, thahrui nena defense khel thin Celtics leh NBA champion lai inhmachhawn tur hi tun NBA playoffs a inkhel nghahhlelh ber zing ami a ni mek.