Rinna kawngah hian a lo kal sual theih hle?
Tun hnaiah sakhuana lama kal fal deuh thenkhatte thiltih a lar hluai mai a, an hotunu ber pasal chu halral thil hlan atana hlan an tum thu a thang nasa hle. Engtin zel nge an awm hriat ni lo mah se, sakhuana thil a nih tawh chuan inkhap a har hle mai a, rinna kawngah hian kan infuih thar nasat zual a ngai khawpin a hriat.
Mizoramah pawh chanchintha kan dawn kum 100 na kan lawm fe hnuin rinna thenkhat, danglam tak tak an la awm nual mai a, heng mite hian midang pel leh bak deuha kal an tum tlangpui thin ni pawhin a lang. Mahse, kan rinna inang tlang veka sawi erawh kan ni thin bawk si! Inenfiah a, kohhran pawhin rawngbawltute tuai tharna hun hi a siam tam deuh deuh fo a ngai a ni.
Rinna hran deuh neite hi a tlangpuiin biak an har a, sakhaw dang betu nia an hriatte lakah an inserh em em a, an hnampui leh thisen zawmpui ngeite pawh anmahni pawla mi an nih loh chuan an tuithlar hmak thei bawk. Mak tak a ni.
Kristianna kan tihah pawh hian tam tak chu a tawlhthluk theih dawn khawpin a hriat a, rawngbawltu tam tak lo dai pelh tawh pawh an awm bawk. Rinna hran neihnain a zui leh ngat a nih phei chuan a hlauhawm zawngin a kal theih mai dawn ni pawhin a lang a, rawngbawlna leh rawngbawltute pawh inenfiah a, intuaithar fo kan va ngai em.
Kan Pathian thu lak dante hi tam tak chu a fuh lo chho tan niin a lang a, kan kal thui hmaa kan inenfiah thiam thuai thuai hi a ngai tawh hle tih i inhre hlawm teh ang u.