EDITORIAL

Tuirial bial atangin inzir ila, phal loh tih tir tum talh hi i sim bawk ang u

Mizoram People Forum (MPF) chuan Tuirial bial bye-election neih tura candidate te an kawmnaah therhlo hmanga inbeihna leh MPF dan zamte zawmtha turin ngenna an siam a, inbeihna mawi lo zawnga awm lo turin an ngen thar a ni ber.
Candidate te atangin harsatna an tawh hrang hrangte sawi chhuak ve bawkin, mipuiten harsatna an tawh hrang hrang, an hnena an thlen thinte zingah a thente phei chu an tihhlawhtlin theih ngai loh turte nia sawi a ni a, candidate leh party te tan chuan a luhaithlak duh ngawt ang. MPF chuan Tuirial bial mipuite chu thawhhona thuthlungin a phal bak candidate-te laka beisei nei lo turin an ngensak phah hial a ni.
Inthlan hrang hrang bakah bye-election thlengin kan hmachhawn leh nual tawh mai a, party hrang hranga hotu thenkhatte chuan tun tum bye-election chu a hautak viau thu an sawi hlawm zel mai a, mipuite atanga demand a san thu an sawi zel bawk. Mipuite harh a hun tawh hle.
Kan aiawha rorelna hmaa ding tur kan thlan ngei a ngai a, danin min phut miau avangin vote thlak ngei pawh kan tih tur a ni. Mahse, thenkhat chu a chhehvelah kan lo buai tawk em em a, candidate mai bakah party te atanga hlawkna leh mahni sahmim tihpuar lo tum ngar ngar kan la awm thin hi chu a pawi ngawt mai.
Nimina inkawmhonaah hian MPF hruaitute chuan candidate-te chu sum leh pai, therhlo hmanga vote zawng lo tur te, a thlawna mipuite thiltihsak – buh phurhsak, ration buhfai a thlawna sem leh pawisa sem te ti lo turte, Election Commission of India (ECI)-in sum sen a phal zat aia sang hmang lo turte, vote thlak tur motor hmanga phur khawm lo tur leh senso tumsak lo tur te, thil tihhlawhtlin theih loh tur intiam leh intiamkamna chi reng reng ti lo turin an ngen a, Tuirial bial mipuite pawhin heng hi hrerengin theih loh tih tir tum talh kawngah candidate leh party te i nawr lo ang u. A tha lo zawnga kan thang hmain mitinin harh nan i hmang mawlh teh ang u. Kan duhna taka vote thlak mai kha a tawk viau!

Leave a Reply

Your email address will not be published. Required fields are marked *

error: Content is protected !!