India in SAFF Championship an khel dawn

Indian football team in a hun takah an mamawh ang result an nei a. Nilaini zanah Maldives lakah 3-1 a chakin 2021 SAFF Championship final an lut.
Maldives a khelh mek inelnaah hian India hi an match hmasa pahnihah beisei pha lovin draw result an nei ve ve a. Final khel turin an inkhel hnuhnung pahnihah chak an mamawh.
Male a National Football Stadium a inkhelah hian India coach Igor Stimac chuan tulna avangin a football fimkhur a kalsan a ngai a. Nepal hnehtu team tidanglam lovin captain Sunil Chhetri-a goal hnih khung an chakpui a. Muallaia khel Mizo midfielder Lalengmawia chu India chakna hnar a ni bawk.
India hian khelh li atang tlawm nei miah lovin point 8 an hmu a, a sang berah awmin Nepal nen naktuk zanah final an khel ang.

Blur Tigers an nung e

A thlengtu ram in an tantute hmaah India an hmachhawn a, mualneitu an nihna angin pawn lam thawm nen an tang thei.
India in team tidanglam lovin goalkeeper Gurpreet Singh Sandhu hmaah Pritam Kotal, Rahul Bheke, Subhasish Bose leh Mandar Rao Dessai an din tir a. Tlarhmaah captain Sunil Chhetri thlawp turin Yasir Mohammad, Brandon Fernandes leh Manvir Singh te an chhawr a. Muallaiah inkhel kaihruai turin Apuia leh Suresh Singh an dah.
First half-ah Maldives an phur a, India in chak an mamawh avangin goal khung tumin football an khel.
India tlarhma a khelten ball tha hmu mahse chance chiang tak a tam lova, Chhetri erawhin a ‘class’ tilangin crossbar a tauh per.
Minute 33-naah India in goal an khung a, Brandon Fernandes siamsak atangin Manvir Singh-a’n a khung a, Blue Tigers in hma an hruai.
Halftime dawnah Pritam Kotal chuan penalty a chawi a, Maldives tan Ali Ashfaq chuan goal-ah a chantir.
Second half tan tirah Fernandes a inhliam avangin lakchhuah a ngai a. India an insiamrem a ngai. First half a India tana muallai thununtu Apuia chungah mawhphurhna a lian lehzual a, an inkhel pum kaihruaitu a nih a ngai.
Mizo rawltharin a kova mawhphurhna tla a hlen a, playmaker rinrawl a nih hnuah a ke atangin India goal hlauhawm tam zawk bul tanna a chhuak.
Chinglensana Singh leh Suresh nen an pathuma ball an inpek kual atang Chhetri-a’n a khung teuh a. Minute 62-naah Apuia ball vawrh luh atangin India in goal an khung a, Manvir-a’n Chhetri tan la in India captain in goal a khung a. Minute 71-naah Apuia bul tan atang bawkin Chhetri-a’n goal a khung a. Ram tana goal khung tam lamah Brazilian legend Pele khumin Chhetri-a’n goal 79 a khung tawh a. Mipa football aram tana goal khung tam parukna a ni.

A solfa vaitu Apuia

Goal hnih a khung avanga man of the match chawimawina dawngtu India captain Sunil Chhetri chuan India chak chhan chu team anga an khelhthat vang a ni tih a hria a. India inkhel tinungtu Apuia hnenah a chawimawina dawn chu a hlan.
MotM chawimawina hlan a nihin Apuia hnenah, “Hei hi i ta tur, kei aiin dawn i phu zawk.” tiin a hlan chhawng.
Igor Stimac hnuaia India team sawiselna lian ber zing ami chu muallai atanga ball thunun thei, inkhel kaihruai thei leh inrintawkna nena ball sem thiam leh ngam an awm lo a ni a. India inkhelah awmze nei lova a sir zawnga ball pass a tam thin.
Nepal lakah bul tan tir ni tawhin India inkhel a danglam a, tun tumah pawh Blue Tigers tana bul a tan vawi li-naah Apuia hi India mamawh chhanna a ni a. Tlarhnung hmaah dingin a khelhpuite hnen atanga ball dawng turin a awm thei zel a, chi ai miah lovin ball a khawih kual thiam hma lamah a sem thin a. India in football hlauhawm an khelh a ngaih huna an khelh theih chhan a ni.
India tlarhnung la nghet chiah lo mahse khingpuite ball pass vawi 16 lai lo dangchatin defence venghimtu a ni bawk.
Captain Chhetri chuan, “Suresh-a nen khan an kheltha dun a man of the match ve ve tlak an ni. Team a thlan an nihin an mitmengah khan an inringtawk em em a, zamna eih an nei lo. An kheltha tak zet.” tiin a fak.
Apuia chuan inkhel zawhah, “He championship-ah hian a ranking sang ber kan nih avangin final kan luh a tul a, kan tum ber niin vawiinah kan tum kan thleng. Team kan lawm a, fans te kan lawmpui.”
“Final-ah in tan leh kan ram tan kan theihtawp kan chhuah dawn a, champion trophy hi rawn hawn ngei kan tum.” tiin a sawi ve bawk.

Leave a Reply

error: Content is protected !!