EIHCHHI TUR by Rempuia R. Lutmang

Rempuia R. Lutmang

Ziah leh chhiar dan kan neih tirh ata a ni mai thei, Sap leh Vai-hoin kan ṭawnga H ri tel hi an hriat loh avangin, hêng—”âwih, bâwih, thaibâwih, dâwih, lêrh” tih angreng hi ‘h’ tel loin an ziak vek ṭhin. Chung mite chu ziah leh chhiar thiam sa an ni a, a thiam ve duh Zopa tan anni chu zirtirtu awm chhun an ni. Chung mite thununna hnuaiah chuan kan pi leh pute’n lehkha an han zir chho a, zirtirtute tih dan leh zirtir dan chu a dik awm chhun a ni lo thei lo ang. Tunlai mi pawhin, “Kan zirtirtupa chuan chuti chuan a ti,” kan tih kan tih ang tho kha a ni mai.
Chu chu lehkhathiam hmasate tih dan a ni chho char char a. Ziaka ‘h’ an telh miau loh avangin a taka an lam chhuah danah pawh ‘h’ a tel lo chho ve thuai ang tih a rinawm. A Mizo zawk khan Vai leh Sap lam dan dik lo kha chhawmin ‘h’ tel loin “âwi, dâwi, bâwi” te an ti ta zel a. ‘H’ tel lo zawk hmang tluanchhuak parha dam chhûng ni chhiar liam ta pawh an awm ang. Tun thleng hian, tunlai mi ziah lehkhabu ṭha pui puiah pawh “Pathian thu âwi” tih hmuh tur a la awm.
Hetianga ‘h’ telh nachang hriat loh hi hmanlaia an hriat fuh loh tam tak zinga chi khat chauh a ni. Heng an hriat fuh loh avang hian kan Sapte kha kan dem hauh lo, kawng awm miah lo rawn vai kaw chawp an ni a, an thawh rimna leh an ṭhahnemngaihna kha kan zavai tan a hlu em em. Chutih rual chuan sawisel thiang lo Serafîm an ni bik lo a, an thu leh hlaa dik hlel a awm chuan sawi sawi ve thei leh sawi ve chhên tur kan ni.
Ziah dan mai a ni lo a, Mizo ṭawng an lam dan thleng khan lehkhathiam hmasa kha chuan an entawn a. Zairema phei chuan “pangpar” hi Mizopa ngeiin “phengpher” an tih te a hria.
Lehkhathiam hmasa Mizopa khan Sap ṭawng pai kha an ngaisang a, Sap anga han ṭawng âwn deuh dah kha changkang an ti a, chu chu an entawn a ni. Thu leh hla ziak thiam hmasa te, pulpit-a sermon thlak thei hmasate kha Mizopa dik tak ni hlawm a; mahse, Sapina kan ṭawng hmanga pai leh ulh taka an chham chhuah ang kha entawn an duh miau avangin hetiang ṭawngkam ulh leh pai lek lek hi kan ṭawngah an tuh nghet a, thûah chauh a ni lo, hlaah pawh a ni ve bawk. Tun thleng hian chutiang chu a dik zawk em maw ti pawh kan la awm ta zel. Mi ṭhenkhat phei chuan hmanlai Mizo ṭawng chheh dan ve reng em maw te an ti bawk.
Zosapte chu demna tur an awm lo, Zoṭawng thiam miau hek lo. Zopate kha a demawm zawk chu an ni a; mahse, Sap ngaihsan a na em a, dem thei kan ni lo. Keini pawh an hun laia mi ni ila eng teh ual kan ni bik chuang lo ang, anni ai aiin kan uar zaw’ mah mai thei. Chutiang vang ringawt chuan a dik lo leh ulh lai kha chhawm hlen tur tihna erawh a ni chuang lo.
Pulpit lama ding pha chinin Sap ṭawng pai ang ang an entawn tih han sawi tâkah chuan sawi tel rem tak tak a awm a, pakhat chauh zep tel teh ang. Pastor Chuautera chuan, “Kan ṭhuihruaite aiin kan fimkhurin kan ngun zawk tur a ni,” a ti a. A “ngun” hman dan hi Zoṭawng thiam chiang lo Sapho hman dan a entawn a ni (ti hmiah mai teh ang).
A! Sawi loh loh tur kan sawi dawn. Tun hmaa ‘h’ tel loa an ziah ṭhin tam tak chu kan pian ve hma daih tawh tho khan ‘h’ telh a dik zawk tih hriain kan mi thiamte’n ‘h’ telh nachang an lo hre daih tawh a. Tun thlenga ‘h’ nachang la hre lo kan awm leh ṭhin hi a zia lo deuh e ka han ti a ni.
Tun hnai lawkah pawh mi ṭhenkhat chuan “A va fiah teh kêlh e” tih turah “A va fiah teh kêl e” tih te an hmang. Sang zakua velah an la chêng ni hmiang ka ti ta mai.
Mi pakhat a awm a, FB velah hian a thai kâwi thui thei khawp mai. Chu mi chuan “Lêrh tia ziah a dik zawk tih inziahna lehkhabu ka hmuh hma chu lêr ka ti zel dawn,” a ti tain ka hria. Hei hi lehkhabu angah ngai se a ṭha ang.

Leave a Reply

Your email address will not be published. Required fields are marked *

error: Content is protected !!