US Tour-ah sak ngam loh hla an nei dawn e

A PUI DAWN | LIVE-Ah VAWI 1,136 SA TAWH MAH SE, PAWI a Thleng thei

US tour an neih dawn meuh chuan Rolling Stones band-in an hla lar tak, ‘Brown Suger’ an thlauhthlak a ngai dawn ta. Guitar riff awm tawh azawnga pui ber zinga chhiar tel an sa lo tur hi fan tam tak tan channa nasa tak a tling thei hial awm e.
Duhthlanna finthlak
Kum 1971 daih tawha US Chart-a number one hauh pha ngat ni mah se, mihang hmeichhiate leh Sal chungchanga tarlanna langsar a nih avangin tunhma lama buaina neuh neuh awm tawh pumpelh an duh tawh bawk nen, US tour an neih turah sak loh mai chu duhthlanna finthlak berah an ngai.
Sal chungchang mai ni lo- mipat hmeichhiatna lam hawia rik buan buanna leh ruihhlo lam a tel zui ta zel khan sawi leh sel a tling.
Veteran guitarist Keith Richards (77) chuan he hla sak an tum loh thu a sawi rualin, mi tam takin dahbo daih mai an duh hial thin chu mak a ti hle bawk, “Sal hlauhawmzia sawi-na a nih dan hi an hrethiam lo emaw ni le aw,” a ti.
An zaipu leh hlaphuahtute zingami Sir Mick Jagger pawhin an sak loh tur zingah a tel ngei tih a sawi chiang a, a chhan berah chuan hla sak tur list tihfel mai a harsat vang,’ a ti thung.
“Kum 1970 atang tawh khan ‘Brown Sugar’ hi kan la sa char char a, tunah chuan lak thlak chhin a, hla dang sakte ka’n han tum chu a ni a, a tul dan azirin kan rikpui hluai te pawh a ni thei tho,” tiin a sawi.
Kum tam liam ta atang tawhin ‘Brown Sugar’ hla hi Rolling Stones hla zinga ‘Jumpin Jack Flash’ tih lovah play hlawh ber niin, Live-ah vawi 1,136 an sa tawh.
Mi pawisawina hla
Critic te chuan hla thu ngial ngan leh bon-ra tak tak awm thluah hi an sawisel nasa hle a, a bik takin mihang hmeichhiate bitum a nih avangin mi pawisawina hla dik takah an ngai hmiah mai a ni.
Hengte vang hian zaipu Jagger ngei pawhin 1995 khan Rolling Stone magazine hmaah, “Tun ang dinhmunah te chuan ni se, he hla hi ka phuah lo tawp ang. Keimah ngei pawh hi ka inthlifim viau ang. ‘Lalpa le, ka thei lo. Ka tawpsan a ngai. Heti ang hla ‘raw’ lutuk tak hi ka ziak lo tawp ang,” a tichhuak hial nghe nghe.

Leave a Reply

Your email address will not be published. Required fields are marked *

error: Content is protected !!