European football : Barcelona hnenah Pedri a rinawm

Barcelona chuan an rawlthar beiseiawm ber zing ami Pedri chu contract rei zawk an ziahpui.
Kum 18 mi hian Camp Nou-ah kum 2026 thleng cham turin contract a ziak a. A contract-ah hian Spanish football a an kalpui thin angin leichhuah theihna a awm a. He ‘release clause’ hi Barcelona chuan Euro tluklehdingawn 1-ah an dah.
Nilaini khan Barcelona hian tunhnaia an player hmabak engte chelh ngheh an tumna kawngah Pedri bikah hian inremna an nei teuh tawh niin thu a darh a. Blaugrana in hmalam an pan zelna tura player pawimawh tak ni tura an ngaih Spain midfielder hi chelh ngheh an duh.
European football a player beiseiawm ber zing ami hi kum nga chhung Catalan club hnenah a cham belh dawn tihna a ni.

Engtin zel?
Barcelona hian nikum nipui khan Pedri hi Las Palmas atangin Euro maktaduai 5 velin an lalut a.Canary Islands a piang rawlthar beiseiawm hian a season hmasa berah rin hlawh nghalin vawi 52 a inkhel a, goal li a khung.
Spain tan pawh a ‘cial’ bikna a lang vat a, March thla a ko a nih hnuah Euro 2020 khan Luis Enrique-a rin zingah a tel nghal a, Young Player of the Tournament chawimawina a dawng.
Tokyo Olympics-ah Spain chu silver medal a lakpui bawk.
Hengte avang hian ngaihven a hlawh a, Barca sum dinhmun tha lo avang leh contract lian a la ziah loh avangin chhuak mai thei anga sawi a ni a. German club Bayern Munich nen pawh sawizawm a ni hman a, hei vang hian Barca in contract ziahpui an hmanhmawh ta a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427