Kerala tui lianah mi 26 thi tawh


India chhim lama ruah nasa tak sur avanga luipui tui lian avanga thi chu mi 26 an tling ta a, khaw tam tak tlawhpawh theih lohvin an awm mek.
Thi zinga panga chu naupang an ni a. Chin hriat loh an la awm nual avangin thi zat hi an pun ngei rin a ni.
Kottayam district-ah chuan chenna in tam tak tuiin a la a, mi tam tak chhanchhuah ngaia tang an la awm bawk.
Video thehdarh pakhatah chuan tuiin bus a chim avanga a mi chuang chhanchhuah an ni lai a lang.
Kottayam leh Idukki te chu a tuar na zual district an ni a. Ni eng emaw zat ruah sur hian lei a timin nasa hle bawk a, lui tui lian chuan khaw tenau zawkte tlawhpawhna leite pawh a la nasa hle.
Tuiin a chim avanga tangkhangte mamawh pek leh chhanchhuah nan sipai helicopter hman a nih thu thuneitute chuan an sawi.
Mi sang tel hmun hima sawn chhuah tawh an ni a, relief camp 184 siam niin mi 8,000 chuang zet ei tur, mutna leh thawmna pek an ni.
Sorkar chuan chenna in leh an thlai chin chânte chu zangnadawmna sum a pek tur thu a puang tawh bawk.
Mi thiam awmna, expert committee chuan an state-a tuikhuahte chu a chim mai hlauhthawnawm khawpa tui a tam avangin sah rih mai tur nge tih an ngaihtuah mek.
Kum 2018 khan Kerala-ah hian ruah sur nasa lutuk kaihhnawiha chhiatna thlengah mi 400 chuang an lo thi tawh a. Hemi tum hian sawi lawk awm lovin tuikhuah sah a ni a, a thlang lama awmten an tuar nasa hle.
Kerala Chief Minister Pinarayi Vijayan chuan committee-in eng tuikhuahte nge sah ngai tih chu thutlukna an siam dawn tih a sawi.
“Mipuiten insasengna hun an neih theih nan sah a nih hmain district collector-te hnenah hriattir hmasak bek a ni ang,” tiin chief minister pisa atanga thuchhuahah tar lan a ni.
Hetih lai hian Indian Meteorological Department chuan Kerala-a hmun thenkhatah ni li lo awm leh tur chhung hian ruah tam tak a la sur dawn niin an sawi lawk.
Idukki district-ah chuan naupang pathum – kum riat, kum sarih leh kum li mi chu an chenna in lei minin a chhilh hnuai atangin an ruang lak chhuah an ni.
Kollam leh vaukam khuaah te chuan sangha manna lawnglengte chu mi tangte chhanchhuah nan hman a ni a. Tui lian chuan kawng a la hek nasa a, thingkung thahnem tak a tlu bawk.
Kerala-ah hian ruah tam tak sur avanga tui lian leh lei min hi thil thleng fo tawh thin a ni a. Tui lian leh khuarel chhiatna dang laka venghim thintu, hmun hnawng leh dil tam tak an neihte chu in lian sak nen leh thil dang tih nan tihchereu nasat a ni a, hei hian chhiatna lian zawk a thlen phah.
Kum 2018-a tui lian kha kum 100 chhunga Kerala-a a la rapthlak ber niin mi maktaduai khat chuangin chenna in leh loh an neih loh phah.
Sorkar laipuiin he mi kuma a chhut dan chuan an state-a lui 44 zet chu an kuang an luang liam niin tar lan a ni a. Heng zinga 10 phei chu India rama lui liana chhiatna thlen tam ber ber theia ngaih an ni hlawm.

Leave a Reply

Your email address will not be published. Required fields are marked *

error: Content is protected !!