Inhlawhfa mi 211-in Covid-19 Package dawng tawh


Inhlawha eizawng, Mizoram Building & Other Construction Workers’ Welfare Board (MBOCWWB) hnuaia inziak lutte tana chhawmdawlna, ‘Covid 19 Package’ dawng mi 211 an awm tawh a, Rs. Nuai 46 chuang pek chhuah a ni tawh.
The Zozam Times zawhna chhangin Labour Employment Skill Develpment & Entrepreneurship department (LESDE) hotute chuan MBOCWWB-a inziak lut, Covid-19 hri kai hamthatna dil mi 411 an awm thu leh mi 211-ten hamthatna an dawng tawh a, mi 200-te erawh pek an la ni lo tih an sawi.
MBOCWWB-a inziak lut, Covid-19 vanga thi, an chhungte hnena Rs. nuai thum pek pakhat a awm tawh tih an sawi a. An sawi zel danin hri kai leh hri avanga thi chhawmdawl nana sum an pek chhuah tawh zawng zawng chu Rs 46,68,000 a ni.
Covid-19 Package dawn tuma diltute dilna an dawnte chu uluk takin an enfiah thin tih an sawi a, hri an kai reng em tih an finfiah leh thin thu an sawi rualin mi thenkhat, dawt hmanga hamthatna dawn tum, hriat chhuahte pawh an awm tih an sawi.
He hamthatna hnuaia hamthatna dawn theihte chu MBOCWWB-a inziak lut, Covid 19 vanga thite chu an nominee-te hnenah Rs nuai thum pek an ni a, hri kai, Covid Care Centre/Community Covid Care Centre/ZMC etc-a enkawlte chu enkawlna hmuna an awm chhungin an inenkawlna atan ni tin Rs 1,000 pek an ni a, an chhuah hnuah an indawm kan nan Rs 10,000 pek an ni a; hri kai, mahni ina inenkawlte chu Rs 10,000 pek an ni bawk.
MBOCWWB-a inziak lut hi mi 60,000 bawr vel an awm a, inziak lut tur hian building construction kaihhnawiha hnathawk, kum khata ni 90 tal hnathawk an ni tur a ni a, welfare board-a inziak lut turin VC leh LC hriatpuina ken a ngai a ni. Welfare board hnena inziak lutte hi mistiri, helper, lungchher, JCB khalhtu, inhlawhfa te an ni.

Leave a Reply

Your email address will not be published. Required fields are marked *

error: Content is protected !!