La Liga : Barca tan beiseina kawl a eng

Barcelona in season bul an tan chhiat avangin boruak rit leh harsa paltlang mek mahse a tha lama inher danglam turin beiseina an nei tih tilang turin Valencia an hneh a. Goal chhuah hmasa a an tan zawk hnuah 3-1 in an lehthal.

Camp Nou-ah hian Valencia an hneh avangin Barca hi La Liga-ah an khingpuite chungah hian an inhlangkai a. Match sarih chhunga hnehna an chan tukm hnihna chauh niin manager Ronald Koeman-a chunga ‘pressure’ na tak awm mek chu hun engemaw chen atan an ti kiang.

Hetihlai hian an khingpuite hian khelh li atang vawi thum chak a season bul an tan hnuah kum hmasa lama an tanna ngaiah tang lehin an match hnuhnung pali atang chak hmel an hmu tawh lo.

Jose Gaya hmangin Los Che hian minute 5-naah goal an khung a, kum 26 mi Spanish full-back in corner atanga ball an petchhuah chu dawngin kawh zetin Barca goal-ah a hlap lut.

Mahse minute 13-naah Barca beiseina lian kum 18 mi Ansu Fati chuan goal a khung a. Halftime dawnah Gaya chuan penalty chawiin Memphis Depay-a’n goal-ah a chantir a. Philippe Coutinho chuan minute 85-naah nikum November 29 hnua Barcelona tana a goal hmasa ber a khung.

Barca hian striker thar Sergio Aguero chu pre-season inbuatsaihnaah a inhliam hnuah a vawikhatna atan an kawr ha chungin inkhel an tem tir zanah hian an coach Koeman chuan, “Kan bul tan dan ngaihtuahin hetiang result nei tura kan rilru huaisenna kan lantir kha fak a phu. Chak kan phu a, goal kan chhuah khan min tinung chiang hle.”

“Tunkarah mahni mualah match thum kan nei a, hei vang hian he kan chak tumna rilru hi kan chhawm tluan tlat a pawimawh dawn.” a ti.

Leave a Reply

Your email address will not be published. Required fields are marked *

error: Content is protected !!