UN World Food Programme (WFP) chuan rang taka puihna pek an nih loh chuan Afghan maktaduai tel chu tun thlasikah hian an \am dawn tih a sawi.
An rama mihring cheng zahve aia tam, mi maktaduai 22.8 chuang chu ei tur nei lo mai thei dinhmunah an ding reng tih an sawi a, naupang kum nga hnuai lam maktaduai 3.2 chu kham khawp ei tur nei lo thei dinhmunah an ding tih WFP chuan a sawi.
“Afghanistan hi khawvela mihring \amna ber zinga mi a ni mek a, a manganthlak tak zet a ni,” tiin WFP executive director David Beasley chuan a sawi.
“Chhiatna lo thleng kan chhiar mek a ni,” a ti.
Afghanistan hi an ram a\anga August thlaa United States an chhuah hnu lawkah Taliban chuan thuneihna changin kum 20 zet hnuah rorelna fawng an chelh leh.
Taliban-ten mipui sorkar paih thlaa rorelna an chan leh mek lai hian an ram ei bar dinhmun a hniam hle a, ram dangin an puihna an pek pawh a tam tawh lo va. Khawthlang ram thiltithei leh World Bank leh International Monetary Fund pawhin an puihna an titawp rih.
Ram dang tam tak hi an ram sum thawh chhuah zinga 10% vel hi ram dang a\anga puihna an dawn a ni tlangpui a, Afghanistan erawh 40% vel lai a ni thung niin World Bank chuan a sawi.
Afghan tam tak chuan ei tur lei nan an neih an hralh a. Taliban thuneitute chuan ram dang a\anga thil lak luh a la dangchat rih a, engtin zel nge an ram hi an hruai dawn hriat a ni rih lo.
Herat-a zirtirtu pakhat chuan, “Thla nga kal taa hlawh ka lak bak ka la la leh lo,” tiin BBC a hrilh a. “Khawsak a harsa a, ina ka neih neih ka hralh a, kan ranvulh leh kan thing chenin kan hralh,” a ti.
Kandahar-a pa pakhat chuan, “Mipui hi kan rethei a ni,” a ti a. “Nimin pawh khan hmeichhe pakhat, tual chhung khualbuk pakhata bawlhhlawh bawm a hai ka hmu a, ei tur paih bâng a zawng a ni. A thiltih chhan ka zawh chuan a fate ei tur a zawng tih a sawi a ni,” a ti.
WFP chuan thlasik apiang hian hmun kilkhawr zawka Afghan awm tak tak chuan damkhaw chhuah an harsat fo thin a; mahse, tun tumah chuan a vawi khat nan khawpuia chengte pawhin thingtlang kilkhawra mite ang bawkin harsatna lian tak an tawk dawn tih an sawi.
UN hnuaia Food & Agriculture Organisation director QU Dongyu chuan, “Hmanhmawh taka chet a ngai a, thlasikin an ram hmun tam tak tlawhpawh theih lohva a siam hmain kan thlen hman a ngai a. Lo neitu, hmeichhia, naupang leh kum upate pawh thlasik vawt nen, ei tur neih loh nen a a hmet dawn a ni,” a ti.
September thla daih tawhah khan WFP chuan Afghan chhungkaw zinga 5% awrh chauhvin ni tin ei khawp tur an nei niin an sawi a. Ei siam nana bulpui, tel leh wheat a to chak em em a. October thla khan naupang maktaduai chuang zet ei tur tha tlakchham vangin an thi thei tih an sawi.
September thla khan Geneva-a ram hrang hrang kalkhawmte chuan Afghan-te puih nan dollar tluklehdingawn khat chuang thawh turin an intiam a, heng zinga hmun thuma thena hmun khat aia tam hi WFP kaltlang tur a ni.
Afghanistan-a ei tur tlakchhamna awm mek karah hian tui a vang hle a, khawkhengin a nuai na hle a. Kum li liam ta chhunga kum hnih chhungin ruah sur an dawng tlem hle.