Tuikukte duat thar lo turin party te inbuatsaih hlawm thei se
Tuirial bial bye-election neih hun a hnai telh telh a, campaign theih hun pawh a tawp tep tawh bawk. Political party tinte an tangin, an vir buai chho hle a, sum leh therhlo ilo, ECI dan kalha tih thawm hriat tur a ri leh nawlh thin reng bawk!
Hetih lai hian khulai bialah khuan mahni duh thua chhuak Tuikukte vote la paih loh an awm nual a, heng mite hian dan angin vote an la rawn thlak thei tlat bawk. An tan rawn kal mai a harsa a ni thei, mahse candidate leh party te tana tlin phah theihna khawp a la nih miau avangin vote thlak tura zu hruai duh mai an awm lovang tih a sawi theih loh.
Hetiang a nih vel chhoh nuai avang hian nimin khan Chief Electoral Officer (CEO) P. Jawahar chuan Tripura Transit Camp-a awm mek Tuikuk voter 663-te vote thlakna tur, Hortoki Booth II leh Zodin Polling Station a tlawh a, hemi hnua Awithangpa Group YMA leh Hortoki Joint YMA hruaitute nen an inkawmnaah Tuikuk vote neite kalna senso political party emaw, candidate-ten emaw an ngaihtuahsak chu Model Code of Conduct bawhchhiatna a nih thu a sawi a, “Hetiang zawnga hma la lo tur hian political party-te hriattir an ni dawn,” a ti a, hmalakna hi na zawka an neih ngei beisei bawk teh ang.
Na deuha zawka Election deparment hi an che a nih loh chuan mipui lam duh loh leh Central YMA hial pawhin thuchhuah an lo siam phahna, Tuikukte duhsakna leh lo buaipuina hi party lam atangin a awm lovang tih a sawi theih loh a, anmahni duh thu ngeia chhuak Tuikukte vulh kawngah a tlawm zawkah loh theih lohin kan tang leh mai lovang tih a sawi theih loh. Chuvang chuan, tun atangin hmalakna hi na zawkin awm thei se la, Mizoram mipuite duh dan ang ngeiin party tinte pawh insum thei hram hlawm se a tha bawk ang.