Mizo National Front (MNF) party hian inthlan dawnah thu tiam hrang hrang, a hna ngaihven zui miah loh an ngah tawh hle a, tun hnaiah inthlan hrang hrangah pawh hetianga thu tiam, a taka chang leh si lo hmuh tur tam tak a awm avangin inthlan dawna MNF thu tiam reng reng chu mipui bumna a nih zel thu Dr Lallianchhunga, Congress party thupuangtu chuan a sawi.
Nimina Aizawl Press Club-a thu thar thehdarhtu an kawmnaah, “Bye-election neih tawhna Aizawl West I leh Serchhip bialahte hian MNF sorkar hi an minister-te nen an inzuar \hin. Tuirial bial bye-election turah pawh uar takin an inzuar leh a. Amaherawhchu, heng bye-election lo neih tawha an intiamte pawh tunah hian pakhatmah tihhlawhtlin a la awm chuang lo,” a ti.
MNF sorkara Sports Minister Robert Romawia Royte-in local/village council inthlan dawn, October 25, 2020 khan Bethlehem veng, Aizawl-ah department danga dil buai ngai loa a tih ve theih leh a tan pawha harsa lo tia gym pek a tiam a; hei bakah Mini Sports Complex siam tiam bawkin measurement pawh an lak nghal thu te, Venghluiah badminton court leh indoor stadium siam \hat a tiam te, Durtlang leh Republic Vengthlangah futsal stadium a tiam te, Hachhek bial Tuidam leh Kawrthahah pawh phul lem phah nghal tur anga insawia lung an phum te, Republic Vengthlang Pitarte tlanga Volleyball Indoor stadium sakna tur lung a phum zawng zawngte pawh kum khat dawn lai a liam hnuah hmalak chhunzawmna hmuh tur a la awm loh thu a sawi.
SEDP chungchang sawiin Dr Lallianchhunga hian, “MNF party-in kum 2018 inthlan dawna chhungkaw tin hnena SEDP cheng nuai thum sem an tiam te chu kum thum dawn a liam hnuah pawh a tak hmuh tur a la awm lo,” a ti a. Traffic jam awm lohna khawpuia Aizawl siam an tum pawh a tak hmuh tur a la awm loh thu sawiin, “Ban pakhat pawh kum thum chhung hian an la phun lo a, cement phek pawh kawng sirah tun thlengin hmuh tur a la awm lo,” a ti a. Field chhawng leh Mizo buh hlir kan ei ang an tih pawh a thu mai a la nih thu sawiin, “Hetiang a nih avang hian, Tuirial bial mipuite leh Mizoram mipuite hian Pu Robert Romawia Royte thutiam hi Pu Zoramthanga thutiam ang chauha rintlak loh a ni tih kan hriat a ngai a. Inthlan dawna MNF thutiam reng reng chu mipui bumna a ni zel a, rin loh tawp tur a ni tih mipuiin kan hriat nawn leh a ngai,” a ti bawk.
Tuirial bial bye-election neih mekah Tuirial bial mipuite chu Chief Minister Zoramthanga’n vauin, ruling party an thlan loh chuan an inchhir tur thu a sawi niin a sawi a. Hei mai bakah Tuirial bial chhunga sorkar hnathawk awm tam tak chu MNF candidate vote tura vau beh an ni tih an hriat thu a sawiin, “He thil hi democracy kalphung leh India dan kalh a nih avangin Congress party chuan pawm zam theihah kan ngai lo a, ngun takin kan chhui dawn a ni,” a ti.
Zoram People’s Movement chungchang sawiin Dr Lallianchhunga hian, “ZPM hian MLA pakhat leh anmahni thlawptu MLA panga an nei mek a. Heng MLA-ten an bial an enkawl danah kalphung thar hmuh tur pakhatmah a awm lo. Tuirial bial mipuite hi a taka ZPM hrechiangtu, a taka enchhin tawhtu an ni a, beidawngin ZPM an chhuahsan nasa hle,” tiin, tunhnaiah ringawt pawh Tuirial bial chhunga ZPM Block, Group leh Unit hruaitu mi 40 chuangin ZPM hi an bansan tawh niin a sawi.
Congress thupuangtu chuan, “Congress party hi mi \ha thlan khawm kan ni lo a; mi tling lo te te awmkhawm kan ni a, chuvangin tihsual palh pawh kan ngah ang. Ngaihdam dil chungin, insiam\hat tumin nasa takin hma kan la mek a ni. Congress Party hian sorkar siam ringawt kan tum lo, sorkar sawngnawi leh rilru te tak ni lo, sorkar \ha, sorkar puitling tak siam kan tum. Chu chu Tuirial bial mipuite pawhin an ring a, beiseina sang tak nen min thlir mek a ni tih kan hria a ni. Beiseina thar nena hmalam pan puiah Tuirial bial mipuite kan sawm a, INC Official Candidate Pu Chalrosanga Ralte (Mavala) lo vote \heuh turin kan ngen nawn leh a ni,” a ti.
Congress party insiam\hat tum mek chungchang zawhna chhangin Dr Lallianchhunga hian, “Kan insiam\ha mek a, vawi leh khatah thil tih rum rum theih loh a. Amaherawh chu, he kan insiam \hat mek hi a vawrtawp thlen hun te pawh a lo awm dawn a. Tunah chuan a la hma deuhte pawh a ni ang a. Mahse, mipui beisei leh rintlakin sorkar puitling tak din thei turin kan insiam\ha ngei ngei dawn a ni,” a ti a. party hotu inthlak leh inthlak loh chungchangah, “Tunah hian boruak a inmung mek a, mipui duh danin, kan hruaitute rilru dam thlap chungin insiam\hatna hi kalpui a ni dawn a ni,” tiin a chhang bawk.