Karhmasaa film shooting neih laia thihna thleng khan nghawng a nei chhunzawm zel a, entertainment industry-a silai hman dan chungchangah zawhna tam tak a inchherchhuan mek.
Actor Alec Baldwin chuan a thawhpui cinematographer Halyna Hutchins a kahhlum palh chungchangah rilru hrehawm takin a awm tih a sawi a, Ningani liam taa New Mexico-a thihna thleng khan lemchan khawvel a barakhaih hle. Hutchins hnung chiaha ding Director Joel Souza pawhin hliam a tuar nghe nghe.
Film siamna hmuna silai/ralthuam himna chungchangah tunge mawhphur?
Hemi chungchangah chuan production tinte’na an neih he-tiang lam thiam bik master emaw armoury expert te hian mawh an phur tlangpui.
Silai hman a nih loh laia dah \hat chungchangah te, him taka hman a nih theih nana actor te zirtir te bakah hman/lek chhuah a nih dawn apianga uluk taka enfiahnaah thlengin mawhphurhna sang tak an nei.
Zawm tur Dan te a awm reng em?
Film industry-ah hian Dan mumal leh awmze nei tak hi a awm lem lo. US federal worldplace safety ageny hian film siamna hmunah leh state tam takah te awmze neiin hmalakna a nei lem lo. Industry te hi an mahni dan siam, mahnia kenkawh ang kha an la ni rih.
Chapman Universty, California-a Professor Dan Leonard chuan, “A tlangpuiin industry te hian inkaihhruai dan tur hi an mahniin an duang chawp mai a, a hranpaa sorkar emaw thuneitu lam atanga siamsak a awm hran lo,” a ti.
Industry-Wide Labor-Managment Safety Committee-in rawtna a siam a awm ve tho bawk a, chutah chuan:
1) Blank (silai ruak) pawh hian thihna a thlen thei. Silai reng reng hi in load sa vek anga ngaih hmiah tur a ni
2) Nangmah leh midang tin chungin silai leklam loh tur
3) Kap tura i inpeih a nih ngawt loh chuan trigger-ah kutzung\ang dah loh tur
4) Silai hmang tur chu a hmuna awm mithiamte’n an load sak ang a, briefing an neih pui hnu-ah chauh kah tur a ni
5) Awmphaw, mit leh beng himna tur ang chi vuah thlap tur.
Vanduaithlak takin, committee lamina inkaihhruaina dan an siama hi zawm ngei ngei tur emaw zawm loh awih loh ang chi a ni leh lova, 2003 hnu lamah phei chuan ennawn lehna a awm tawh lo nghe nghe.
Film studio lar Warner Bros chuan an mahni pualin silai leh a kaihhnawih hman chungchangah inkaihhruaina dan bik an nei a, Actor’s Equity Association ve thung chuan performer te tan thurawn pek ang chi an nei ve bawk.