ECI-in Tuikukte vote thlak dan turah ruahmanna la siam lo


Tuirial bial MLA by election neih huna vote thlak hun chu ni thum chauhin dang tawh mah se Tripura-a Tuikuk awm, Mizoram electoral roll-a chuangte vote thlak dan turah Election Commission of India-in ruahmanna a la siam lo a, MBDPF hruaituten mahni sensoa Tripura a\anga vote thlaka kal duh an awm an ring lo.
The Zozam Times zawhna chhangin, Mizoram election department hotute chuan Tuikukte vote thlak dan tur chungchangah ECI atangin eng thu mah an la dawng lo tih an sawi a, “ECI lam hian special arrangement siamsak a ngai lo an tiah kan ngai a, vote thlak an duh chuan anmahni sensoin an rawn pan ve mai ang chu,” an ti.
Hetihlai hian Mizoram Bru Displaced People’s Forum (MBDPF) hruaitute chuan Tuirial bial chhunga vote nei, Tripura-a awm tawh Tuikukte hian vote an thlak dan tur chungchangah sorkar a\angin eng thu mah an la dawng lo tih The Zozam Times an hrilh a, hetiang a nih chuan mahni sensoa Tripura a\anga Mizorama vote thlak tura rawn kal duh an awm an rin loh thu an sawi.
MBDPF hruaitute chuan Tuirial biala vote neite hi political party-ten motor-a an rawn lam a nih chuan kal duh tawkte chu an awm mai thei tia sawiin, Mizorama political party zingah erawh Tuikuk vote neiten vote an thlak theihna tura an awmna hmun pan emaw, phone hmanga bia emaw an la awm lo tih an sawi.
Tar lan tawh \hin angin, Mizoram Election department hotute chuan Tripura-a Tuikukte chu Mizoram chhunga an awmna polling station ngeia vote thlak turin ECI an lo ngen tawh a ni.

Leave a Reply

error: Content is protected !!