CM leh tourism minister-in horticulture centre an suasam : ZPM

Zoram People’s Movement (ZPM) party chuan ngun taka an zir chian hnuah, Zoram kuthnathawktute innghahna, horticulture centre chu a changtu Chief Minister Zoramthanga leh Tourism Minister Robert Romawia Royte ten nasa taka suasam mekah puhin, nuai bo vek pawi tih lohna an neih phenah sum insiam tumna lian tak a awm ngei nia an hmuh thu an sawi.
Nimina thu thar thehdarhtute an kawmnaah PC Vanlalruata, Secretary General, ZPM chuan Aizawl Chite hmuna horticulture centre chu suasamin, Convention Centre leh Aizawl Haat (bazar) sak tur an sah thlak fel tawh thu leh contractor-te pawhin pawisa an dawng fel tawh nia an hriat thu a sawi a, “‘Mizoram economic system hi horticulture hmanga a dum leh var, chhim leh hmar ang a thlak ka tum’ titu Mizoram Chief Minister Pu Zoramthanga chuan kuthnathawktute tana rohlu tak chu Tourism Minister Pu Robert Romawia Royte kut-ah Tourist Convention Centre sakna tur leh Aizawl Haat (Bazar) sakna tur atan a pe a ni,” a ti.
Mizorama Horticulture Centre hmasa ber leh changtlung berah hian Multipurpose Training Centre changtlung tak te din niin, cold storage leh packaging house te nen thuam a nih avang leh, Israel Technology /Hi-Technology Green House engemaw zah siam niin heng Green house-ah hian serthlum, kawlthei, theihai, thingfanghma, dragon fruit chi te siam chhuah \hin a nih avangin Mizorama kuthnathawktute’n an chhawr \angkai em em laia, Tourist Convention Centre project phuah chawp tak mai, hman zui tlak pawh ni leh chuang lo tur hmanga Zoram kuthnathawktute rohlu nuai bo tumna a nih thu a sawi.
“North East Scicon Bank (tissue culture) hmasa ber pawh he centre-ah hian din a lo ni tawh a. Mushroom Training Centre changtlung tak a awm mek a, Mushroom chi siam chhuakin, farmer-te lei theih turin Mushroom Block siam chhuah a ni a. Sorkar policy lian NLUP, SEDP hnuaiah thlai chi hrang hrang \iak pe chhuaktu lian ber a ni \hin a, hun rei tak ata tawh vawiin thlengin Zoram kuthnathawktute innghahna leh an mamawh siam chhuaktu ber a nih avangin kan kan farmer te innghahna lian ber zing a mi, rohlu tak a ni a,” tiin, kut hnathawktute rohlu ber zinga mi chhuhsaka project lian, hman zui leh loh tur buaipui hi a \ul an tih loh thu leh pawi an tih thu a sawi.
PC Vanlalruata hian, “Tumah zahpah pawh nei lovin, Chief Minister Pu Zoramthanga leh Tourism minister Pu Robert Romawia Royte te inkawp hian khaw eng zahna chhete mah an nei lo tih a chiang hle. Kuthnathawktute rohlu ber zinga mi Horticulture Centre chu hnung thak inhiah tawnna project lian takah an hmang tih hi mit a hmutu tan chuan phat rual a ni lo,” a ti.
“Chief Minister zahawm tak leh Tourism Minister-te hian sum siam nan a Tourist Convention Centre leh Aizawl Haat sak ngei an duh a nih tak zet chuan, hetianga project sum siamna tur ringawta kan thil \ha neihsa an tichhe tur hi kan ui a,” tiin hmun hma dang ngaihtuah zawk tura an ngen thu a sawi a. ZPM chu Zoram kuthnathawktute hmaah huaisen takin a ding zel tur thu leh, hetiang mai maia minister pahnih inkawp ina sum siam tumna anga he centre hman an tum chu theihtawp chhuaha an do tlat tur thu sawiin, “A do dan tur erawh tun maiah chuan sawi lawk theih a la ni lo,” a ti bawk.

Leave a Reply

Your email address will not be published. Required fields are marked *

error: Content is protected !!