Pathian leh Sum

Pathian leh Sum

  • Rinfela Zadeng

Mihring kan nih chhunga kan rilru luahtu ber chu Pathian leh sum hi a ni ti ila kan sawi sual lo ang. He khawvela kan awm chhung hian sum leh Pathian thu hi kan buaipui a, kan thlan thlengin he thil pahnih hian min umzui a ni. Chuti taka pawimawh a nih avang chuan Lal Isua pawh khan Tlang chunga a thusawiah khan a telh a, mipui tam takin an ngaithla a nih kha. Lal Isua Krista min zirtir dan behchhanin – Pathian leh sum hi engti anga buaipui tur nge tih kan zir ang.

Tlang chunga thusawi
Chanchin Tha Matthaia ziak bung 5:1 tanga bung 7:29 thleng hi ‘Tlang chunga thusawi’ chhungah khung a ni a; Chanchin Tha Luka ziak kan en erawh chuan hmun zawlah te pawh a sawi niin a lang a. Chuvang chuan tum khata Lal Isua thusawi zawng zawng ni loin, Lal Isua zirtirna pawimawh tak tak te chu Matthaia hian hmun khatah a lakhawm ang a, Luka hian Matthaia sawi bak hi hmiun hran hranah a dah thung niin mi thiamte chuan an ngai a, a pawmawm hle.

Lal Isua thuneihna hmanga zirtirna
Tlang chunga Lal Isua thusawite hi thuneitu leh Pathian fapa a nihna hmanga amah zuitute a zirtirna thu a ni tiin ESV Global Study Bible chuan min hrilh a. Israel fate khan Thuthlung Hlui zawlneite’n an lo hrilh lawk tawh Messiah, Hriakthih, Isarel hnam chunga roreltu tur leh an lal tur kha nghakhlel takin an lo thlir a nih kha. Chu an Lal nghah Lal Isua Krista chuan thunei tak leh Pathian Lal ram luhna tura thilpawimawh chu Israelte, mipuite leh a zirtirte kha a zirtir a ni. Tlang chunga Lal Isua thusawi leh a zirtirna te hi a taka hman nghal theih, mihirng nun dan tur leh Lal Isua’n amah zuitute nun dan tur a beiseina a ni. India hnam pa Mahatma Gandhi leh tuna Delhi Chief Minister Arvind Kejriwal te pawh hian he laia Lal Isua zirtirna hi an ngaina hle a nih kha.

Thu chungin a zirtir
Juda te chuan an sakhua leh dan zirtirtu ‘Rabbi’ te hi an ngaisangin an zah em em a; Lal Isua pawh hi zirtirtu ropui tak a ni tih kha an hria a, Rabbi tiin an ko thin bawk a nih kha (Marka 9:5, adt). Rabbi te hian mipuite an zirtir dawn reng rengin thu chungin an zirtir thin a, chu chu Juda hnam tihdan phung a ni. Lal Isua Krista pawh hian mipuite leh a zirtir te kha thu chungin a zirtir tih kan hmu. Tlang chunga thu a sawi hi thusawi saltiah a ni lo a; Lal Isua’n mipuite hi thunei tak leh khun khan takin a zirtir tihna nih chu. Chuvangin thu pawimawh tak leh amah zuitute’n an zawm ngei tura a duh kha Lal Isua hian a zirtir a ni.

Sum leh Pathian
Lal Isua’n mipuite hnenah zirtirna pawimawh tak a pek tum hian sum leh Pathian chungchang pawh a tel tih Matthaia bung 7:24-ah kan hmu a nih kha. Sum leh Pathian hian mihring nunah hmun laili ber a chang a, inngahna atan kan hmang a ni tih Lal Isua pawh hian a hre chiang em em a; chuvangin mipuite hnenah pawh hian chiang takin a zirtir a ni. Eng chen nge kan buaipui tur ni a, sum leh pai ngah hi sual a lo ni reng em? Sum leh pai hi ringtute hian kan buaipui tur a ni em? Sum bawiha kan awm tur a ni em? Pathian leh sum leh pai chu kan nei kawp thei em? Chung zawhna pawimawh leh kan nitin nuna zawhna awm reng kha Lal Isua hian chiang takin mipuite hi a hirlh fiah a, a zirtir a ni.

Hotu pahnih
Lal Isua hi mihring famkim a nih avangin mihring rilru leh ngaihtuahna te hi a hrechiang em em a; sum leh Pathian hian mihring te rilru a luah hneh zia a hre chiang em em bawk. Chuvang chuan Lal Isua zuitu tak tak ni tur chuan mi pahnih rawng a bawl kawp theih loh a; pakhat zawk zawk chu a thlang tur a ni tiin Lal Isua’n a sawi. Heta Lal Isua thusawi ‘rawngbawl’ hi ‘bawih, sal’ tihna a ni a. Bawih leh sal chuan a neitu lakah a hun zawng zawng a pek a ngai a, ama thuin a nung ve thei lo. Pathian tih loha kan rilru luahtu lian ber sum leh pai hi a ni tih Lal Isua pawh hian a hrechiang hle a, chuvang chuan Lal Isua hian chuang takin sum leh Pathian ram chu thliar fel turin min duh a ni. Sum bawih nge Pathain bawih kan nih tih Lal Isua hian min zawt a ni.

Sum laka kan rilru put hmang
Lal Isua min zirtirna atang chuan sum bawih/sal kan ni thiang lo a, Pathian ta, Pathian rawngbawltu leh Pathian tan chauha inpe ringtu kan ni tur tihna a ni chu. Chutih rualin sum leh pai zawng zawng hi kan hnualsuat tur tihna a ni lo a, sum kan hmang ve lo tur tihna pawh a ni hek lo. Pathian aia thil dang bawiha awm tur kan ni lo tih hin Lal Isua min zirtir tum ber chu a ni. He lai thua ‘sum’ tih hi pawisa ngawr ngawr piah lamah kan thil neihte pawh a huam tel a. Kan thil neih te hmachhuana Pathian duh dan dodal khawpa nun hi kan tih hauh loh tur a ni tihna a ni. Sum leh pai um ringawta kan rilru leh ngaihtuahna kan hman chuan Pathian tan hun kan nei thei lo a, Pathian thiltitheihna aia sum leh pai thiltihtheihnaa innghat zawk kan nih kha Lal Isua hian a phal lo. Pathian tana kan rilru zawng zawng kan pekna chuan sum leh pai awhna sual laka min veng him dawn a ni.
Khawvela kan awm chhungin sum kan mamawh a; kan thawkchhuak tur a ni. Lal Isua zuitu kan nih tlat avangin Lal Isua hi a hmasa berah kan dah ang a, a dawtah sum leh pai. Kan sum leh pai thawhchuah hmangin Lal Isua chanchin kan hril ang a; Pathian malsawmna kan dawn hmangin rawngbawlna kan kalpui tur a ni. Chu chu Lal Isua’n a hnungzuitu te laka a phut a ni a, sum laka kan rilru put hmang tur pawh a ni.

Leave a Reply

Your email address will not be published. Required fields are marked *

error: Content is protected !!