India-in a thunun chin Kashmir-a police-te chuan T20 World Cup khelh meka Pakistan-in India an hneh \um lo lawmtu, damdawi lam thiamna zirlai pahnih chu anti-terror law hmangin thubuai an siamsak.
Pakistan hian an hmelma kumhlun, India hi Pathianni khan United Arab Emirates-a inkhelah wicket 10-in an hneh a. India an chak loh avang hian Punjab-a Kashmiri zirlai leh India team-a Muslim sakhaw zuitute chu social media-ah nasa taka beih zui an ni.
India dodalna leh duh lohna hi Kashmir-ah hian a lar hle a. Himalaya tlangdunga awm hi India leh Pakistan chuan rorelna an insiam.
Kum 1990 chho a\ang khan India-in a awp chin Kashmir-ah hian helna a chhuak nasa \an a, anni hian Muslim ram, Pakistan-a beh emaw, a nih loh chuan ram hran neih an phut.
Thil thleng fo tawh \hin angin India-Pakistan cricket inkhel pawh hi Kashmir phaikuamah hian mi cheng tam tak chuan Pakistan an \an tih an tilang.
Pathiannia an inkhelha India an chak loh pawh khan he lai ram bial, ram pahnihin an inchuh rengah hian lawmna a nasa hle a. Tun \um hi Pakistan-in cricket World Cup-a India an hneh vawi khatna a ni nghe nghe.
Lawm taka phusa zingah hian helai biala medical college tha pahnih, Srinagar-a Government Medical College leh Sher-i-Kashmir Institute of Medical Sciences-a zirlaite pawh an tel a. An awmna hostel-a Pakistan chak an lawm lai chu social media-ah a darh nasa hle.
Thawhlehni khan police hotu lian pakhat chuan Unlawful Activities Prevention Act (UAPA) hnuaiah thubuai siamsak an ni tih sawiin, an zat a sawi lo va; cricket khelhnaah ram inpumkhatna tichhe zawngin an che niin an puh.
First Information Report (FIR)-ah zirlai hming tar lan a ni lo va, tumah man an la nei lo bawk.
Thawh\anniah pawh khan Kashmiri zirlai, Punjab-a college pahniha kal lai chu Pakistan hnehna an lawm avangin sawisak an lo ni tawh.
Heng zirlaite hian an pindanah inkhel an en chu miin luhchilhin an sawisak rawn a, hliam pawh an tuar nual niin an insawi.
Damdawi thiamna zirlaite laka UAPA thubuai siamsakte hi online-ah nasa taka sawi zui a ni a, social media hmangtu \henkhat chuan ‘Pakistan-a thawn tur’ an ti a, sorkar hna pawh pek loh ni se an ti bawk.
2014 Asia Cup tournament lai khan Pakistan-in India an hneh lawmtu Kashmiri zirlai 60 dawn chu Uttar Pradesh-a an luhna college-in a lo hrem tawh bawk.
Kashmir-a BJP president, Ravinder Raina chuan ‘hmelma ram Pakistan’ chak lawmtu chu lung inah khung an ni thuai dawn tih a sawi.
Chief minister hlui, Mehbooba Mufti erawh chuan Pakistan chak lawm vanga Kashmiri-ten kut an tuar chu \ha lo a tih thu a sawi.
August, 2019 khan Prime Minister Narendra Modi-a sorkar chuan ram danpui hmanga Kashmir a hung bikna, Article 370 leh 35A chu hlimpin India-a Muslim state awm chhunin mahnia ro inrelna hran bik deuh a neih chu a hlihsak.
Sorkarin hetianga an inhung bikna a hlihsak avang hian thla eng emaw zat chhung chu venhimna khauh taka kalpui zui niin Kashmiri tam tak man an ni a, state ni thin chu sorkar laipui enkawl turin union territory pahnihah then a ni nghal bawk.
Hung bikna hlih a nih hnuah hian hel pawl tam tak che chhuakin tun thlengin mi 39 an thi tawh a. Tun thla bik ringawtah pawh civil mi 12, hel pawla mi 17 leh sipai 10 an thi tawh.
Kum 1990 atanga India dona leh inlak hran tuma beitute chetna avangin mi sang tel an lo thi tawh bawk.
Tun tuma Pakistan chak lawmna avanga thubuai insiamsak hi dan hmaah a tling tawk em tih zawhna a awm nghal a, Kashmiri human rights lawyer pakhat chuan hetiang mai mai hi dan hmaa thiam loh channa a tling lo tih a sawi.