Japanese Princess Mako chuan college a kal laia a ngaihzawng, Kei Komuro chu pasalah a nei ta a, a lal nihna zawng zawng erawh a chân phah thung.
Japanese danah chuan lal chhungkaw zinga hmeichhiain mi pangngai a neih chuan lal thlah a nihna a kalsan a ngai a, mipa erawh chuan a ngai ve kher lo.
Princess hian an ram dana lal inneihnaa thlahna leh thuamchhawm atana pawisa an dawn \hin ang pawh a dawng thei dawn ta lo va. He thil pahnih hlohva pasal nei hmasa ber a ni.
Tuak tharte hi United States lamah an awm zui rin a ni a, hei hi a pasal, Komuro-a hna thawhna hmun niin lawyer a ni.
Princess Mako leh Komuro inngaizawng hi an ramah chuan an buaipui hle a, British royal?Meghan Markle leh Prince Harry nen khaikhinin ‘Japan ram Harry leh Meghan’ tiin an sawi \hin.
Markle-i ang bawkin Komuro hi Mako-i nen an inngaizawng tih puan a nih a\angin mi sawi a kai a. Tun hnai maiah pawh an rama a haw \uma a sam a zuah dan chu mipuiin an sawisel nasa hle.
Tabloid chanchinbu leh social media-ah pawh an rama an tih ngai loh ang taka sam a ti vel chuan princess nei tlak a nih lohzia an sawi nasat phah hle.
Thawhlehnia an inneih niah pawh hian mi tam tak chuan an inneih duh lohna an lantir a ni.
Thawhlehnia thuthar lakhawmtute a kawmnaah Mako-i hian pasal a neih chungchanga an ram mite rilru a tihnatnaah ngaihdam a dil.
“Hetiang tih dan phung lo ka ti hi ngaihdam ka dil a, chutih rual chuan min thlawp tlattute chungah ka lawm a ni,” a ti niin NHK chuan a tar lang a. “Ka tan chuan Kei-a hi tumah thlak zo an awm lo va, inneih hi kan pahnih tan duhthlan ngei tur thil a ni,” a ti.
Komuro-a pawhin Mako-a chu a hmangaih a, dam chhung hun hmanpui a duh tih a sawi.
“Mako-i ka hmangaih a. Nun pakhat chauh kan nei a, kan hmangaihte nena dam chhung hman hi kan duh \heuh a ni,” tiin a sawi niin AFP chuan a tar lang a. “Mako-i dinhmun khirh takah ka awmtir a, a rilru leh taksa lam pawh puhna dik lo tak tak avangin a hrehawm phah tih ka hria a, pawi ka ti tak zet a ni,” a ti bawk.
Princess Mako-i hian an ram sanaa Thawhlehni chawhma dar 10:00 (India-a zing dar 6:30) vel khan Tokyo-a an lal in a chhuahsan a. A nu leh pa, Crown Prince Fumihito leh Crown Princess Kiko chu vawi tam chibai bukin a thingthi a. A laizawn (a nau) chu a kal hmain a kuah bawk tih Kyodo chuan a tar lang.
Komuro nena an inngaihzawn chungchangah hian kum tam tak chhung chu chanchinbute zui an ni a, amah ngei pawhin tuarin rilru lama natna pawh a neih phah niin Imperial Household Agency (IHA) chuan a lo sawi tawh thin.
Princess hlui ni ta leh Komuro hi kum 2017 khan an inhual a, a hnu kumah innei mai tura tih an ni a; mahse, sum lama Komuro-a nu a talbuai zui avangin an thulh nia sawi a ni a. A bialpa hlui pawisa a puk a pe leh thei lo niin an sawi.
Lal chhungkua erawh chuan hei hi an inneih loh chhan a nih loh thu an sawi a, hetih rual hian Crown Prince Fumihito chuan sum chungchang chu inneih hmaa engkim tihfel a tha ber tih a sawi thung.
Japanese mipuiin Komuro-a an duh loh chhan ber hi an lal fate tan chuan kawppui tha a ni dawn lo niin an ngai a, a bikin an hnama la duh fir chin mit a tlung zo lo hle.
Komuro-a hian New York law firm lian tak atangin sawmna a dawn chu zawmin hna a thawk a, a awm bo chhung hian an ram chanchinbute chuan nasa takin an bei a, a nu chungchangah pawh an sawi nasa hle.