Manchester United che fuh hleithei lo avangin an manager chungah duh khawp lohna a sang a, a kova phurrit awm chu ti rit belh zual turin Pathianni zanah an hmelma Liverpool kutah an mualpho. Hei vang hian Ole Gunnar Solskjaer chu an ban mai dawn niin titi a tam a, Thawhlehni ah erawh kartawp a Tottenham hmachhawn turin a team training a la kaihruai.
United hian an match hnuhnung pakua atang vawi thum chiah hnehna an chang a, vawi nga tlawmin draw vawikhat an nei. Premier League-ah Leicester City leh Liverpool te a zawna an ngam loh hnuah first team player zingah Solskjaer leh a coaching staff te chunga rinna nghat zo tawh lo an awm niin thu a thang tel a. Player-ten tuna an chetchhiatlai atanga khaichhuak turin an ring zo lo.
Club board lam hi Solsljaer thlawp tlattu an ni fo thin a, tunah pawh a chunga rinna nghah an la duh a, mahse an dinhmun siamtha turin hmabak a ko hle tih erawh an pawm niin ngaihdan a awm.
Engtin zel?
Liverpool laka an mualpho hnuah United player-te hi Thawhtanni awl tir an ni a, Thawhlehni-ah erawh Carrington-a an training hmunah inbuatsaihna an nei leh tan a, hetah hian Solskjaer a tel.
Thawhtanni khan Manchester United executive vice-chairman Ed Woodward bakah club neitu Joel Glazer leh group managing director Richard Arnold ten club chungchang hi sawihona an nei a. Club tantute leh pawn lam atanga Solskjaer ban tura nawrna a tam avangin ngaihtuahna an seng.
Leicester City laka an tlawm hnuah Solskjaer hi club lamin an thlawp tlat tawh a. Thawhtanni-ah pawh manager thlak tumna club lam hnai atangin an neih loh thu darh mahse United lamin engmah thuchhuah an la nei lova. Hei vang hian Solskjaer-a hma hun hi a chiang vek bik lo niin an ngai.
Kum 48 mi hi United khaichhuak turin a tha tawk em tih zawhna fans zingah a lian tawh a. Player-ten a tactic bakah coaching a kalpui dan leh team a thlan dante an ring tawk tawh lo nia thu a than leh bawk si avangin Solskjaer-a’n a hma hun tinghet turin hmabak a nei ko.
An ban tak tak ang em?
United hian an manager chungah hian rinna an la nghat chhunzawm zel thei a, club hotu lamin innghah an huam. Chutihrualin United in Jose Mourinho kum thum kalta dawna an ban tum khan an thlawp tlat thu sawi reng chungin thutlukna an siam a. Hei vang hian club tana tha tura ngaih thutlukna huai siam an hreh lo.
Tottenham lakah hian Solskjaer hian result tha nei pawh nise a kova phurrit a la lian dawn a, Atalanta leh Manchester City te hmachhawn hmabak an la nei. Man City an hmachhawn hnua international khel tura fixture awl a awmlai hi United tana thutlukna siam hunlai remchang niin a lang a. Ban a manager thar lak pawhin inkhel hmachhawn hma in hunthawl deuh zawk a nei thei anga, club in Solskjaer an chhawr chhunzawm dawn a nih pawhin a tan insiamremna hun a ni thei ang.
Ban ta se?
Solskjaer-a thlaktu tur inrinsiakna hi a lian nghal a. Thawhtanni khan club lam pawhin tunge an lakluh theih ang tih zawhna hi neiin a rukin an dap tan niin thu a thang.
Hming lam rik langsar zingah Chelsea coach hlui Antonio Conte hming a ri ring a. Real Madrid coach hlui Zinedine Zidane pawh sawirik a ni bawk.
Conte hian Premier League a hna thawh leh hi a duh a, Inter Milan a chhuahsan hnuah hna dang a la thawk leh lo. Season laihawl a hna thar zawm hi a duhdan ni ngai lo mahse United squad hi hlawhtlinpui theih a inbeisei hle a, hei vang hian Manchester pan a duh niin European football expert-ten an sawi.
Kum 52 mi hi United tan lakluh nghal theih a nih dawn avangin ngaihtuah tel loh theih loh a ni a. Chutihrualin a hnathawh dan avangin club hotu lamah ngaihdan a inang lo.
England leh Italy-ah league title la tawh coach hi United in an club kalphung nghet an lo neih tawh nen a hnathawh duhdan a inang lo niin an ngai a. United ziarang zawm aiin an coach ban tak Jose Mourinho hnathawh dan ziarang a hnaih zawk niin an ngai.
Manager awl lai ni ve mek Real Madrid manager hlui Zinedine Zidane chuan nimin khan England pan a tum loh thu a tichiang niin an sawi ve thung a. Kum 49 mi hian Real Madrid vawi hnih a enkawl chhungin Champions League vawi thum leh La Liga title vawi hnih a la hman a. France national team-ah Didier Deschamps thlaktu atan rin a ni zawk.
Zidane hi khawvel football-ah Real Madrid hlawhtlinpui mahse ani pawh a hnathawh danah zawhna leh seltu la tawk ve thin tho a ni a. Player lar te enkawl thiam nimahsela tactic leh player coaching pekah a tha tawk lo nia ngai an awm.
Ajax coach Erik ten Hag sawirik a ni bawk a. Dutch team hlawhtling taka enkawltu hi a football a hmuhnawm avangin awttu ngah a ni a. Mahse Premier League club hausa thut Newcastle United in England a coach hlawh hnem ber pathumna ni tura an sawm chhuah zawh loh a ni a. United lamin an hmin thei ang em tih zawhna a awm mek.
Leicester City coach Brendan Rodgers pawh sawilan a ni leh a, nimahsela Liverpool coach hlui a nih thin chuan midang pathum lakah a buk a ti rit lo nia ngaihna a awm mek thung.