ZPM Southern Hqrs., Lunglei hruaitute chuan sorkarna chelhtu rorel lai, MNF MLA-te chu Mizoram chhim lam biala an hnathawh danah mipui an lungawi loh thu leh ruling bial nihin awmzia a neih loh bakah chhim lam bial hi ngaihthah an nih thu an sawi.
Nimin khan Aizawl Press Club-ah thu thar thehdarhtute an kawm a. An pawl president C. Lalhmingliana chuan rorel lai MNF party hian tun lai hian Tuirial bial bye-election campaign naah te chuan ruling bial nih \hatzia leh development nasa taka a awm thu uar takin sawi \hinin, Lunglei district hi ruling bial vek tih theih deuh thaw ni mah se, tuna a lan danah ngaih\ha takin chhim lam bial mipuite an hnuchhawn ni bera a lan thu a sawi a. “Tuna kan ruling MLA-te chet dan thlir hi chuan opposition bial ni zawk ila, sorkar an nawr kal zawk daihin a rinawm,” a ti.
Khaw kar kawng chu sawi loh khawpui chhung kawngpui chhe lutuk te, bawlhhlawh sawngbawl dan mumal a la awm theih loh thu te leh RT-PCR khawl bunsak duh lawk loh a\angte hian MNF ministry-in Lunglei mipuite leh an civil hospital an hlamchhiahzia chu tlang hriat a nih thu a sawi a. Party dang kaihhruai sorkar hmasa hnathawh Pukpui – Sazaikawn Bypass road an chhunzawm duh loh te hi mipui ngaihpawimawh lohna nia an hriat thu a sawi.
“MLA inthlan dawn apianga Lunglei district tana MNF campaign au hla ber leh manifesto a tel ‘Lungleia Commissioner puitling dah,’ tih te, ‘Chhim lam tan Lunglei district-a airport siam’ tih te leh ‘Tlabung Border Trade’ te lah tih hlawhtlin a ni bawk si lo. Kumin kum tira District Court office tihchangtlung tura chief minister-in building ropui leh changtlung zawka sak \hat tura min tiam hi kutthlak a la ni lo hrim hrim bawk,” C Lalhmingliana’n a ti.
RT-PCR khawl chungchang sawiin Lalrinpuii, Vice President, ZPM Southern Hqrs., Lunglei chuan, April 19, 2021 khan Prime Minister office ah amah ngei zualkovin, MLA Zodintluanga’n a thlawna khawl a pek chu bun mai turin a dil niin a sawi a. “April 22, 2021 khan PMO a\angin Mizoram Chief Secretary hnenah lehkha thawn a ni a. Chu lehkha chu petitioner ka nih angin lehkha pek ka ni ve nghe nghe. Mahse, lehkha chu chief secretary hian a lo dah bo reng nge ka hre lo a,” a ti a. Lungleiah a hranpaa lei ngai lo, bun mai tura an dilna erawh bengkhawn a hlawh ngai lo niin a sawi bawk.
Lalrinpuii chuan, “MLA Dr K Pachhunga statement, DIPR in a tihchhuah khan ICMR-in ni khatah sample 100 tal test tur an neih loh chuan an permission kha cancel tur tih ziak kha thil awihawm loh tak a ni. Kei pawhin ICMR ah research te ka zuk nei a ni,” a ti a. “High court in thutlukna a siam angin tunah hian peih lo takin, hreh tak leh chak lo takin khawl an bun a, tun October thla chhung hian an bun zo thei dawn lo niin an sawi,” a ti.
Ruling bial nih hian awmzia a nei lo tih hi an hriat chian thu leh chhim lam hi ngaihthah an ni tih an chian em thu sawiin, “Kan nawr chawp apiang khan an kal a ni ber. National health Mission-a thawktu reng rengin hlawh hi thla hnih/thum te an hren sak a. K-deposit ah te an dah sak. Nawr chawp tak tak sorkar an nihna hi a ninawm kan ti,” tiin Lalrinpuii hian a sawi a. Inter-border trade tichangtlungin siam \hat an intiam pawh, vawiin thlengin hmalakna a awm loh thu a sawi bawk.