BJP Mizoram Pradesh chuan thingtlang mite tana ni 100 inhlawhna, Mahatma Gandhi National Rural Employment Guarantee Scheme (MGNREGS) chu Chief Minister Zoramthanga kaihhruai MNF sorkarin eirukna khurpuia siamah an puh.
Central scheme MGNREGS kalpui a nih dan zirchianga RTI hmanga an zawhna te chhan a nih dan tarlangin, BJP Mizoram Pradesh Central Schemes Monitoring & Vigilance Cell chuan, Mizoram sorkar-in Gazette Notification chhuahin state level ah State Employment Guarantee Council, district level-ah District Employment Council (DEC), block level-ah Block Employment Council (BEC) leh village level-ah Village Employment Council (VEC) siamin MGNREGS kalpui turin thuneihna pein, VEC nilo chu a taka din leh kalpuina pakhatmah awm lo tih hmuhchhuah a nih thu an tar lang a. “MNF Ministry hian MGNREGS inkaihhruaina dan pawngsualin eirukna khurpuiah a siam chho ta hi a pawi kan ti hle,” an ti.
Kum khat chhunga thingtlang mite ni 100 inhlawhna tur pawisa (wage component) central sorkarin zaa za tum sakin, mipui inhlawhna (wage component) a\anga zaa 40 material component a nih thu an sawi a. Hetih lai hian, central sorkar-in MGNREGS a pek a\anga material compoment lo kal chu MNF ruling party worker-te duhsak nana hman a nih bakah, Aizawl khawpui chhunga MNF worker-te hnenah thingtlang khaw tam takah MC hna (contract works) pein, MGNREGS (wage component) rim taka buaipuitu VC/VEC leh thingtlang mipuite chanpual chhuhsakna a nih avangin thingtlang mite rahbehna lian tak a nih thu an sawi.
BJP Mizoram Pradesh hian MNF sorkarin DRDA Office, BDO office-te hminga contract hna siam a, MGNREGS a kalpui dan bawlhhlawh tak duh lohna hi central sorkarah thlengin hma an lak tur thu an sawi bawk.
Central sorkarin welfare scheme tam tak a kalpui zingah MGNREGS hi thingtlang mite dawmkanna tur, hnathawh tur awm pawh khawpui area pawn lam tan a ni ti hriaiin, MNF sorkar chu rang taka MGNREGS Act anga kalpui tur turin an hriattir nghal thu an sawi bawk a ni.