Nimin khawvar hma khan Kolalian daiah hnam dang tu tih hriat lohten Chuhvel khaw mi, Lalfakawma (26) chu an that.
Thudawn danin, bawng lei turin mi pali, Chuhvel mi pahnih leh Bawngva mi pahnihte chu Ningani zan khan Kolalian lamah hian an kal a, Kolalian khaw pelh, Assam ram dep, Mizoram PWD kawng (ZHKD) black top chinah bawng nei nia inchhal hnam dangte nen hian an inhmu a. Bawng kaitute chuan bawng a kal \hat duh loh avangin puih an ngaih thu a rawn thlen a, an inzui ta a, km khat vel an kal hnuah mi dang lo langin light hmanga enin silaiin an kap zui ta mai niin thudawn a ni.
Bawng lei tura kal zinga mi, Lalfakawma chu tualchher silai hmanga kah a ni a, a hmunah hian a boral nghal a, mi dang pathumte pawh hian hliam na tak an tuar a. Hnam dangte hian bawng leina tura sum an ken cheng nuai khat bakah an mobile phone pahnih leh driving licence an laksak bawk a ni.
He thil thleng chungchangah hian Mamit Bawrhsap Dr Lalrozama chuan hma la nghalin magistrate leh Mamit SP-te chu a hmunah an kal nghal a, Hailakandi DC nen pawh inbe tawhin anni lam pawhin hma an la nghal a, he thil thleng hi mi sual thil tih niin ramri buaina a ni lova mipuite chiai lo turin a ngen bawk tih Mamit bawrhsap chuan a sawi a ni.
Taitesena Group YMA chuan thuchhuah siamin, Assam leh Mizoram inrina bul, Kolalian piah lawka an member-pui, Lafakawma, Chuhvel Branch rawng taka thah a ni chu an dem tak zet tih sawiin, tun hnuah hetiang thil hi thleng tawh lo se an duh tih leh he tualthahna hi a rang thei ang bera chhuichhuak tur leh an phu tawk hremna pe ngei turin Mizoram police an ngen.
He thilah hian hnam leh hnam inkara inhriatthiam lohna thleng palh thei thila fimkhur tur leh ramri bul hnaia chet lak fimkhur turin Taitesena Group YMA chuan mipuite an ngen bawk.