Higher & Technical Education Minister Dr R Lalthangliana chuan zirlaiten scholarship an hmuh ngei theih nan theih tawp chhuaha hmalak a ni a, tribal affairs ministry hotute dawr turin mi thiam tirh thlak an nih thu a sawi.
Nimina Mizo Students’ Union (MSU) General Conference vawi-19-na a hmanpuinaah Dr R Lalthangliana chuan post matric scholarship chungchanga harsatna sawi neuh neuh awmah pawh theihtawp chhuah a nih thu a sawi a, “Tribal affairs ministry lamte biakpawp an ni a, lehkha leh phone hmanga umzui a ni,” a ti.
Dr Thangtea chuan tribal affairs ministry hotute dawr turin tunah hian mi thiam tirh thlak mek a nih thu a sawi a, hetihlai hian central lamah thil kal thelh leh lo inmil lo a awm vangte, guideline an lo thlak vangte bakah, festival lai a nih avangin tum ang tak chuan a kal chak thei rih lo tih a sawi.
Minister chuan Mizoram University Southern Campus atana hmalaknate sawiin, “Hei hi kan ram tan asset/rohlu pawimawh tak a ni,” tiin, subject-te pawh tunlai khawvel mila siam a nih tur thu a sawi.
Mizo Students’ Union chu ram leh hnam tana pawl \hahnemngai tak, hnam thila tlanchhe ngai lo an ni chu fakawm a tih thu sawiin, “Kan inpumkhat a, kan inlungrual chuan hnam dang lakah kan zahawm a ni,” a ti.
Conference inkhawm hi MSU Vice President RK Hnuna’n a kaihruai a, khual zahawm Sakai Lian Luai leh Special Guest L. Daniela, EM, LADC te pawhin thu sawiin, conference souvenir, Kulva tlangzarh a ni bawk a, chawhnu lamah MSU President J Lalmuanzuala kaihhruai rorel inkhawm neih a ni.