Inrinni hian India ram hmun hrang hrangah bye-election a awm dawn a. Lok Sabha bial thum bakah assembly bial 30-ah neih a ni dawn.
Lok Sabha inthlan hi Dadra & Nagar Haveli, Himachal Pradesh-a Mandi leh Madhya Pradesh-a Khandwa bialah neih a ni dawn a. Assembly bypoll hi state 14-ah neih a ni dawn thung.
Hmun hrang hranga vote tlate hi November 2-ah chhiar tan a ni ang.
Bihar
Tarapur leh Kusheshwar Asthan bialah inthlan hi neih a ni dawn a. Heng bial hnih hi a vawng mektu MLA pahnih, Shashi Bhushan Hazari leh Mewalal Choudhary te an thih vanga awl a ni a, an pahnih hian JD(U) ve ve an ni.
Tarapur-ah hian RJD atanga chuhtu, Arun Kumar Sah chuan JD(U) aiawha ding, Rajiv Kumar Singh a khing dawn a. Lok Janshakti Party (Ram Vilas) chuan Chandan Singh dintirin Congress-in Rajesh Mishra an dintir bawk.
Kusheshwar Sthan-ah hian JD(U) chuan Aman Hazari an dintir a, ani hi MLA thi ta, Shashi Bhushan Hazari-a fapa a ni a. Congress chuan Atirek Kumar dintirin RJD-in Ganesh Bharti an dintir bawk.
Himachal Pradesh
Himachal Pradesh-ah hian Mandi Lok Sabha bial bakah Vidhan Sabha-a Arki, Fatehpur leh Jubbal-Kotkhai bialah inthlan a ni dawn.
Jubbal-Kotkhai tih loh inthlanna tur dang zawngah hian rorel lai, BJP leh Congress party an inpawt na hle a. Jubbal-Kotkhai bial bikah chuan BJP atanga chhuaka bâng ta, Chetan Singh Bragta chuan independent-in a chuh leh a, ani hi chak ngei tura ngaih a ni.
Mandi hial hi Himachal Pradesh Chief Minister Jai Ram Thakur-a awmna district a ni a, ani a tlak nat bakah BJP-in an dintir, Kargil war hero Brigadier Khushal Singh Thakur chuan beisei a nei sang hle.
Hetih rual hian chief minister vawi ruk zet lo ni tawh, Virbhadra Singh-a nupui, Pratibha Singh chuan Congress hmingin a chuh ve bawk a, ani hi helai district mi tho a ni.
Jubbal-Kotkhai bialah hian BJP chhuahsantu, Bragta hi BJP atanga chuhtu, Neelam Seraik nen an inkhing dawn a. Anni bakah hian Congress atangin Rohit Thakur leh independent-in Suman Kadam ten an chuh bawk.
Arki bialah BJP hminga chuhtu, Rattan Singh Pal leh Congress-in an vawrh chhuah, Sanjay chu an inkhing tawk hle tura ngaih a ni a. Independent-a chuhtu, Jeet Ram a la awm bawk.
Fatehpur-ah hian BJP atanga chuhtu, Baldev Thakur leh Congress aiawha ding, Bhawani Singh Pathania te chu inkhing tawk hle tura ngaih an ni bawk.
Karnataka
Hanagal leh Sindgi bialah inthlan a ni dawn a, heng bial vawngtu, Sindgi-a JD(S) MLA M C Managuli leh Hangal-a BJP MLA C M Udasi te an thih vanga ruak ta a ni.
Hanagal-ah hian BJP-in an vawrh chhuah, Shivaraj Sajjanar leh Srinivas Mane te chu inkhing tawk hle tura ngaih an ni.
Sindgi-ah hian Ramesh Bhusanur chuan BJP hminga chuhin Congress aiawhin Ashok Managuli chuan a chuh dawn a. Ani hi January-a thi ta, JD(S) MLA M C Managuli fapa a ni a. JD(S) hian Naziya Angadi an dintir ve thung.
Telengana
Huzurabad bialtu MLA tang lai, health minister hlui a bân avangin inthlan ngai a ni.
Eatala Rajender hi rorel lai, Telangana Rashtra Samithi (TRS) chhuahsanin BJP a zawm a, a bâng zui a, a bial a ruak.
TRS hian Gellu Srinivas Yadav an dintir a. Congress-in an state-a NSUI chief B Venkat Narsing Rao an vawrh chhuak thung.
Maharashtra
Nanded district-a Deglur bialah inthlan a ni dawn a. MLA tang lai, Raosaheb Antapurkar a thih vanga inthlan ngai a ni.
Congress chuan Antapurkar fapa, Raosaheb Antapurkar dintirin BJP-in Subhash Sabne an vawrh chhuak thung.
Janata Dal (Secular)-in Vivek Kerkar leh Bahujan Bharat Party atangin Parmeshwar Waghmare ten an chuh bawk.
Maharashtra
Sirsa district-a Ellenabad assembly bialah inthlan a ni dawn a. Kil thum atanga inchuhna a awm a, eptu, INLD MLA Abhay Singh Chautala chu January khan farm law duh lohna kal zel avangin a bâng a, a bial hi a ruak ta a ni.
BJP-in Gobind Kanda an dintir a, Congress chuan BJP atanga peng ta, Pawan Beniwal an dintir ve thung.
Rajasthan
Assembly bial hnih, Vallabhnagar leh Dhariawad-ah inthlan a ni dawn a. Tun tum inthlan hi Ashok Gehlot-a kaihhruai Congress sorkar fiahna a ni.
Dhariawad bialtu, BJP MLA Gautam Lal Meena leh Vallabhnagar bialtu Congress MLA, Gajendra Singh Shaktawat te thih vanga inthlan ngai a ni.
Congress hian Shaktawat-a nupui, Preeti Shaktawat chu Udaipur-a Vallabhnagar-ah hian an dintir a. BJP-in Himmat Singh Jhala an dintir bawk.
BJP MLA hlui leh Janta Sena chief Randhir Singh Bhinder chuan independent-in a chuh a. Anni bakah hian BJP atanga chhuak, Udailal Dangi chuan Rashtriya Loktantrik Party (RLP) hmingin a chuh bawk.
Pratapgarh-a Dhariawad-ah hian BJP chuan Khet Singh Meena an dintir laiin Congress-in Nagraj Meena an chuhtir ve thung.
Assam
Gossaigaon, Bhabanipur, Tamulpur, Mariani leh Thowra bialah inthlan a ni ang.
Gossaigaon leh Tamulpur bialtu MLA te an thih avangin inthlan ngai a ni a. Bhabanipur, Mariani leh Thowra-ah erawh MLA tang laiten bânga BJP an zawm vanga ruak a ni.
Bial tinah hian Congress leh BJP an inkhing ber dawn a. Congress chuan bial tin chuhin BJP hian bial thum chuhin bial hnih dang erawh an thawhpui, UPPL an chuhtir ve thung.
Andhra Pradesh
Badvel (SC) bial, Kadapa district-ah inthlan a ni dawn.
March thlaa MLA tang lai, G Venkata Subbaiah-an a thihsan avanga bial ruakah hian rorel lai, YSR Congress, BJP leh Congress te chuan candidate an nei vek.
Eptu party lian ber, Telugu Desam erawh chuan YSRC-in MLA thi ta nupui an chuhtir avangin an kian tih sawiin an chuh ve lo.
YSRC hian Dasari Sudha chu dintirin Congress-in MLA hlui, P M Kalamamma an dintir a, ani hi he bialah hian kum 2009-14 inkar MLA a lo ni tawh a. BJP erawh chuan thalai, Panathala Suresh an dintir thung.
Meghalaya
Bial thum – Mawryngkneng, Mawphlang leh Rajabala-ah inthlan a ni dawn a. Mawryngkneng bial hi Congress MLA David Nongrum-a thih vanga ruak niin Mawphlang bial pawh hi independent MLA SK Sunn thih vanga ruak bawk a ni.
West Bengal
Bengal-ah hian Kharadaha, Shantipur, Dinhata leh Gosaba bialah inthlan a ni dawn a. Gosaba leh Khardaha bial hi MLA tang lai thih vanga ruak niin Dinhata leh Shantipur bial hi MP tang lai – Nishith Pramanik leh Jagannath Sarkar te an bân vanga ruak a ni.