Sudan-a sipai leh mipui aiawhten thuneihna in\awm an neih \hiata sipaiten thuneihna pumhlum an chan duh lohna lantirtute chu venhim hna thawktuten bei letin thi an awm nual tawh a. Doctor-te chuan a zat chiah hriat theih a ni lo tih an sawi.
Africa khawmualpui hmarchhaka ram rethei takah hian sipai leh mipui aiawhten thuneihna in\awmin mipui rorelna pumhlum a awm theih nana insiam rem hun chhung atan tih a ni ni a; mahse, sipaite hian Thawh\anni khan sorkar hian \hiatin thuneihna an inpe.
United States leh United Nations chuan Sudan-a sipai sorkar thar hi na takin an nawr mek.
Ningania mipuiin an sorkar thar duh lohna an lantirnaah mi pakhat a thi niin damdawi ina thawkte chuan an sawi a. Hei hi sorkar duh loh an lantir ni lina a ni tawh.
An khawpui, Khartoum-ah chuan mipui leh sipaite an innawr nasa hle a. UN Security Council chuan sipaite chu mipui telna sorkar an paih thlak tak chu tung ding leh turin an ti.
Doctor pawl chuan mi thi leh hliam zat hi an hriat theih mai rih loh thu an sawi.
Central Committee of Sudanese Doctors chuan Thawh\anni a\anga sipai duh lohna lantirah hian mi pariat vel thi an hriat chian thu an sawi a; mahse, khawpui dang dangah pawh sipaiten silaia ralthuam keng lo cilvil mite an beih avangin thihna leh hliam an tam a rinawm tih an sawi.
Sipaite hian mi eng zat chiah nge an man tawh pawh hriat a ni lo.
US President Joe Biden chuan a hnungtawlh zawnga thil thleng chu \ha a tih loh thu leh mipui telna sorkar insiam rem mek chu tung ding leh turin sipaite a ti.
Prime minister paih thlak tak, Abdalla Hamdok chu pawn chhuak thei lova hren la niin a minister-ten hmuh an tum pawh Ningani khan hnar an ni.
Mipui rorelna duhtu mipuite hian Inrinni hian ‘march of millions’ tia hming vuahin lian zawka chet an tum.
General Abdel Fattah al-Burhan-a hi kum 2019-a thalai tam tak kaihhruaina hnuaia Omar al-Bashir-a paih thlak a nih hnu khan an ram hruaitu a ni a. Mipui aiawhte nen thuneihna intawm an nei a, Thawhtanni khan mipui aiawh zawng hi manin thuneihna a chang.
Prime Minister Hamdok chu pawn chhuak thei lova hren niin an khawpuiah chuan mipuiin sipai sorkar thar duh lohna nasa takin an lantir a, Inrinni hian lian tham taka chet an la tum.
Kawngpui an dang a, lung leh eng eng emaw an tiang a, lirthei ke an hal bawk a. Mipui lungawi lohna zawmin dawr tam zawk an inkhar a. “Sipai thuneihna hi kan duh lo va, he ram hi mipui rorelna hnuaia zalen taka khawsak kan duh a ni,” tiin mipui zinga pakhat chuan AFP news agency a hrilh.
Ningani khan Khartoum hmar lama Burri district leh Khartoum North lamah mipui an che nasain sipai nen pawh an innawr hle a. Khartoum North-ah hian mi pakhat a thi tih doctor-ten an sawi.
Thi awm thar leh nen hian Thawhtanni atanga sipai sorkar duh loh lantirnaa thi hi mi pariat chu hriat chian an ni tawh a, mi 170 vel hliam tuar an awm a; mahse, khawpui danga thil thleng a awm ve tho avangin a zat hi a dik chiah tihna a ni lo.
Sipaite hian anmahni duh lohna lantirtute hi mittui tlakna hlo leh thelret silaimuin an kap thin a, hliam pawh an awm nual a. A hnu lamah silaimu pangngai pawh an hmang zui ta nia sawi a ni.