Ole Gunnar Solskjaer leh Manchester United in result mamawh tak dinhmun atangin an mamawh ang tak hnehna an chang a. Tottenham Hotspur chu an mualah 3-0 a hnehin Inrinni zanah 3-0 in an chak.
Club pahnih manager-te an chetthat loh avanga phurrit an kova tla mek a ni a, hei vang a ‘El Sackico’ tia hminglem an vuahna inkhelah hian United in Liverpool laka an mualphona nawhreh tumin an khel a. An hlawhtlin avangin Tottenham enkawltu Nuno Espirito Santo chungah selna leh fans te beiseina a kovah a inbun belh.
Thawhlehna chu
Tottenham Hotspur Stadium-ah Solskjaer-a’n chak a mamawh a, a hna a him lo tih hre chungin formation a thlak. Tlarhnungah centre-back pathum remin Harry Maguire, Victor Lindelof leh Raphael Varane te a rem a, tlarhmaah Cristiano Ronaldo leh Edinson Cavani an inkawp.
A hnung a ngheh phawt United in an ngai pawimawh a, hei hi an inkhelah pawh langin nidang aiin an ball inpek kual danah awmzia a awm zawk. Tlarhma a pahnihte leh thlawptu Bruno Fernandes ten hlauhawm siam an tum hle bawk a. Lehlamah Tottenham tan Son Heung-min a langsar lehnghal a. England chhuanvawr Harry Kane-a’n thlawp tha se result a danglam ang.
Spurs in goal hlauhawm an nei hmasa a, goal pawh Cristian Romero hmangin khung hmasa mahse offside avanga nawhreh a ni bawk.
Minute 39-naah Ronaldo leh Fernandes ten player danglam bik an nihna lantirin an goal tur an thawkchhuak a, United no.7 hian laklawh awm miah lovin kawh takin a volley lut.
Second half tan tirah Ronaldo-a’n goal pawm loh a khung nawn a, lawm rei lo mahse minute 64-naah Edinson Cavani khung tur a siamsak a. Huntawp dawnah amah thlaktu Marcus Rashford-a’n Premier League inkhelah khelmualah minute 106 chauh tun season-ah hun la hmang mahse a goal hnihna a khung.
Solskjaer a la him lo
Tottenham muala hnehna chan hi engtiklai pawh a thil lawmawm a ni a, mahse hei chauh hian Solskjaer a chhanhim zovin a rinawm lo. Atalanta leh Manchester City hmachhawn tur an la nei a, tun season-ah Norwegian manager hi uluk taka buk a ni reng fo tawh ang.
Premier League match nga chhunga a team a chakpui hmasak ber niin, “Kei, fans leh player-te inkara pawimawh ber chu kan tangrual a, tan hmun khata kan din tlat hi a ni.”
“Kar hreawm leh harsa tak player, club, fans leh keimah mimal ngei pawhin kan hmang a. Titi tam tak leh thuthang lakah ka inthiarfihlim viau a, mahse thil thleng hrang hrangte hriat loh vek theih a ni bik lova, chuvang chuan tha taka khelh loh a thiang lo.” tiin inkhel zawhah a sawi.