Robert Romawia’n dan a bawhchhia :Congress thupuangtu
Robert Romawia’n dan a bawhchhe lo :MNF Party
Congress party thupuangtu Dr Lallianchhunga’n vawiina bye-election neihna Tuirial bialah MNF prty adviser, minister of state ni bawk Robert Romawia Royte leh a thuihruai ten dan an bawhchhia niin a sawi a. MNF party-in Robert Romawia’n dan a bawhchhelo niin an sawi thung.
Congress party thupuangtu tukinah Hortoki khuaah Robert Romawia Royte leh a thuihruaite hmuh an nih thu leh MPF hruaitute hmalaknaa Hortoki atanga umchhuah an nih thu a sawi a. Campaign tawp ni October 27, 2021 tlai dar 6 atanga inthlanna zawh hma chu bial pawn lam mi, candidate leh an agent te bak Tuirial biala awm phallohna dan leh thupek Kolasib district election officer pawhin a tihchhuah chu an bawhchhia niin a sawi.
Rober Romawia te chu tukin dar 6-ah Hortoki-ah hmuh an nih tawh avangin nizan lamah pawh Tuirial bial chhungah an riaklut ngei tawh nia a lan thu Congress thupuangtu chuan a sawi a. “Sorkar dan an pawisa lova, hre reng chunga sorkar dan bawhchhe lui an nih avangin an phu tawk hremna pe turin thuneitute kan ngen a ni” a ti bawk.
MNF party pawhin hemi chungchangah hian vawiin vek khan thuchhuah siamin Robert Romawia’n dan a bawhchhe lo niin an sawi a. Robert Romawia chu Saron Veng LC member Vanlalpeka, nena an ram enfel tura an kal chu eptu party ten mipui bum tumin election dan bawhchhiaah an puh mai niin an sawi.
MNF party thuchhuaha a lan danin Robert Romawi chuan tukin dar 3:45 ah Aizawl a\anga chhuakin, Thimmuk Zau, Hortoki leh West Serzawl inkar a pan a, dar 5:55 velah Hortoki a thleng. MPF te nen tha taka inbiain Tlawng kaiah, Lengpui lam atanga amah lo hmuaktu Vanlalpeka te ho nen ram en turin Tlawng an kan a, an programme hi Hortoki VCP pawh an hrilh lawk a, Hortoki-a din muan an tum loh avangin VCP chuan MPF emaw party emaw pawh a lo hrilh lo niin an tarlang.
“Thuthang thenkhata dan bawhchhiatna awm ang lek leka ngaih theih leh ‘MPF-in kirtir leh’ tih ang renga social media-a post awm hi thudiklo a ni” MNF thuchhuah chuan a ti bawk.