Premier League hmahruaitu Chelsea in Newcastle United lakah harsatna nei miah lovin hnehna an chang a. Full-back Reece James chuan goal hnih khungin 3-0 in an chak.
Inrinni zanah Blues hi neitu hausa nei thar Magpies khelmual St. James’ Park-ah an lenglut a, stadium khatin Newcastle United fans te awm mahse team naran lakah harsatna an nei lo.
First half-ah goal a luh loh hnuah Callum Hudson-Odoi cross atangin James-a’n minute 65-naah kawh takin a khung a. Minute 12 hnuah England wing-back in an goal hnihna a khung a. Newcastle goalkeeper Karl Darlow chuan Chelsea substitute Ruben Loftus-Cheek ball pet dansak mahse James-a pet a dang nawn thei lo.
Kai Havertz lakah Darlow hian penalty chawi bawkin Jorginho chuan goal-ah a chantir a. Steve Bruce an ban hnua mahni muala an inkhel hmasa berah Newcastle United in goal hlauhawm siam an harsat hle a. 19-naah awm mekin tun season-ah match 10 atangin hnehna an la chang lo.
Chelsea boss Thomas Tuchel chuan an khingpuiten fimkhur taka football an khelh avangin an tan dawhtheih a pawimawh thu inkhel zawhah a sawi a. “Dawhtheih leh mutthluk a inang lo, vawiin angah kha chuan kan dawhtheih a pawimawh a. Inkhel thunun tumna nei zawk kan ni a, lehlamin an tum ve loh avangin vawiin angah kha chuan a awlsam lova, huntha kan neih kan nghah ve a ngai.” a ti.