Arsenal in tunhnaia an harhtharna chu nung takin an la kalpui a. Leicester City chu an mualah ngei harsatna nei lovin 2-0 in an hneh.
King Power Stadium-ah hian mikhual zawk hian an khingpuite hi inkhel tan tir lamah hneh takin an thunun a. A tir minute 20 chhungin goal hnih an khung.
Minute 5-naah Leicester City defender rual inthlahdah avangin Gabriel Magalhaes chuan Bukayo Saka corner a tauh lut a. Minute 18-naah Emile Smith Rowe chuan Saka leh Alexandre Lacazette te thawhrah sengtin an goal hnihna a khung.
Gunners hian hnehna an chan avangin Premier League table-ah 10-na atangin parukna an luah phah a. Leicester City insiamthat hnuah point thum an hmuhna turin an goalkeeper Aaron Ramsdale an mamawh a. Ani hian save tha vawi engemaw zat a nei a, Mikel Arteta pawlten a zawnin league inkhel vawi sarih chhung tlawm hmel an hmu tawh lo mek.
Lehlamah Foxes in Manchester United leh Brentford an hneh tuma football hlauhawm an khel hleithei lova. James Maddison-a freekick Ramsdale-a’n ropui taka a save chu an chance neih hlauhawm ber a ni.
Arsenal manager Mikel Arteta chuan inkhel zawhah a goalkeeper a fak a. “Khang save ropui tak takte kha kan mamawh a, mimal chetthat hi chak nan a pawimawh a danglamna siamtu a ni thin.” a ti a.
“Team tha ber zing ami an ni a, helai khelmualah hian hnehna rawn chan a harsa thin. Kan chak mai ni lovin kan chak dan kha a lungawithlak ka ti a, a bik takin second half-ah inkhel dahtha turin kan thawk tha hle.” tiin inkhel a thlirlet.